18 февраль ҳолатига кўра, Орол денгизи қуриган ер майдонининг 363 минг гектарига саксовул уруғи экилган яна 917,2 минг гектар ер экишга тайёрланган. Бу ҳақда ЎзА хабар берди.
Фавқулодда вазиятлар вазирлиги бошчилигида тузилган тезкор штаб томонидан тақдим қилинган маълумотга кўра, тайёр уруғни идишларга жойлаштириш, экиш майдонларини тайёрлаш, экиш ва бошқа тадбирларда жами бир минг 560 киши иштирок этган. Бу ишларга 462 техника ва 2 самолёт жалб қилинган.
Самолёт ёрдамида 266 минг гектар майдонга саксовул уруғи сепилган бўлса, трактор ёрдамида 96,5 минг гектар ерга экилган. Бугунги кунгача бир минг 321 тоннадан ортиқ саксовул уруғи йиғилган. Унинг 260 минг килограммдан ортиғи маҳаллий аҳоли томонидан йиғилиб, уларга меҳнат ҳақи ўз вақтида бериб келинмоқда. Ҳозирги кунга қадар тўрт миллиард сўмдан ортиқ пул маҳаллий уруғ йиғувчилар меҳнатига тўланган.
«Денгизнинг қуриган майдонларида 40 та артезиан қудуғи қазиладиган бўлди. Чучук сув чиқяпти. Бу келажакда чорвачиликни ривожлантириш имконини беради, дегани. Қатор хорижий ва маҳаллий ҳамкорларимиз саксовуллар орасига доривор гиёҳлар экиш ишларини ҳам бошламоқчи. Бу ҳам ўта истиқболли лойиҳа», — дейди Қорақалпоғистон Республикаси Ўрмон хўжалиги давлат қўмитаси раиси Узақберген Утамбетов.
Жорий йилда денгизнинг қуриган майдонида 500 минг гектар «яшил қоплама» барпо этиш режалаштирилган бўлиб, бунинг учун 100 миллиард сўм ажратилган.
Изоҳ (0)