2019 йил 19 февраль куни Қ.М. исмли аёл Наманган вилоят ИИБга тамагирлик ҳолати юзасидан ариза билан мурожаат қилди. Бу ҳақда «Дарё»га ИИБ матбуот хизмати маълум қилди.

Фото: UzNews

Аризачи Наманган шаҳридаги 31 ва 70-сонли мактабларда таҳсил олувчи фарзандларини 42-сонли мактабга кўчириш мақсадида келганида ушбу мактабдаги М.М исмли аёл бунинг эвазига 300 минг сўм талаб қилганлигини билдирган.

Мазкур аризага асосан шу куни вилоят ИИБ ЖҚБ Коррупция ва иқтисодий жиноятларга қарши курашиш бўлими ходимлари томонидан ўтказилган тадбир давомида 42-умумтаълим мактаби директори лавозимида ишловчи М.М. ўз хизмат хонасида 300 минг сўмни пора тариқасида олган вақтида ушланган.

Мазкур ҳолат юзасидан вилоят прокуратураси томонидан  ЖКнинг 210-моддаси 1-қисми билан жиноят иши қўзғатилиб, тергов ҳаракатлари олиб борилмоқда.