Самарқандда бомбани зарарсизлантириш, тартиббузарликларни бартараф қилиш каби машғулотлар ўтказилди

Самарқанд вилояти ИИБ ва Самарқанд вилояти ҳуқуқни муҳофаза қилувчи органлар ҳамкорликда тезкор режалар асосида амалга ошириладиган чора-тадбирлар махсус режаларига аниқликлар киритиш, режаларни амалда синаб кўриш ҳамда ҳамкорликни ошириш мақсадида назарий ва амалий ўқув машғулотлари ўтказилди. Бу ҳақда «Дарё»га вилоят ИИБ матбуот хизмати хабар бермоқда.

Ўқув машғулотлари давомида автотранспортда қочаётган қуролланган жиноятчиларни қўлга олиш, объектда жойлашган қуролланган жиноятчиларни қўлга олиш бўйича амалий машғулотлар ўтказилди. Шунингдек, оммавий тартиббузарликларни бартараф этиш, портловчи қурилмани зарарсизлантириш каби шартли ҳолатлар бўйича амалий ҳаракатлар амалга оширилиб, бу борада шахсий таркибнинг жанговар шайлигини оширишга эришилди.

Машғулотлар давомида барча махсус режаларга аниқликлар киритилди. Аниқланган камчиликлар раҳбарият ҳузурида муҳокама этилиб, уларни бартараф этиш бўйича чора-тадбирлар белгилаб олинди.

Ўтказилган машғулотдан кўзланган натижага эришилди, машғулот давомида ўз вазифаларига сидқидилдан ёндашган ходимлар фахрий ёрлиқлар билан тақдирланди.