Қашқадарё вилояти Деҳқонобод туманининг «Теракли» МФЙ, «Теракли» қишлоғида яшовчи опа-ука 12 ёшли Юлдуз ва 9 ёшли Файзибек ота-онаси ўртасидаги келишмовчилик сабаб тоққа қочиб кетган. Опа-укалар туман хотин-қизлар қўмитаси раиси Меҳри Йўлдошева аралашуви билан топилган. Бу ҳақда 20 февраль куни бўлиб ўтган вилоят хотин-қизлар қўмитасининг матбуот брифингида маълум қилинди.
Деҳқонобод туман Хотин-қизлар қўмитаси раиси Меҳри Йўлдошеванинг «Дарё»га қўшимча қилишича, асли нишонлик Р.Б деҳқонободлик қариндоши Б.Б га турмушга чиқиб, 5 нафар фарзандли бўлган. Яқин қариндошлар ўртасидаги никоҳ сабабми оиланинг кенжа фарзанди ногирон бўлиб туғилган. Энг кичик фарзанд ҳозирда Қарши шаҳридаги «Мурувват уйи»да тарбияланади. Эр-хотин ўртасидаги келишмовчилик сабаб, фарзандларни Р.Б.нинг опаси ўзи яшайдиган Тошкент шаҳрига олиб кетади ва ўзига тегишли савдо дўконларида ишлатиб келади.
«Болалар ишдан безиганиданми ёки отасини соғинибми бирин-кетин уйига қочиб келади, — дейди туман хотин-қизлар қўмитаси раиси Меҳри Йўлдошева. — Она эса 1,5 йилдан кейин қайтиб келиб, турмуш ўртоғи билан қонуний ажрашади. Суд ҳукмига кўра она 2 нафар фарзанди Юлдуз ва Файзибекни олиб кетмоқчи бўлади».
Маълум бўлишича, эр-хотин Б.Б ва Р.Б ўзаро келишмовчилик сабаб қонуний ажрашган бўлиб, суд ҳукмига кўра оиланинг 2 нафар фарзанди ота, 2 нафар фарзанди эса она қарамоғига берилган.
«Ота фарзандларига онани шу қадар ёмон кўрсатганки, фарзандларда она ва холага нисбатан нафрат кучайиб кетган, — дейди Меҳри Йўлдошева. – Шу сабабли ҳам онаси билан кетмаслик учун Юлдуз ва Файзибек тоғдаги арчазорга қочиб кетган. Бу ота томонидан атайлаб уюштирилган бўлиши ҳам мумкин. Лекин туман ҳокимлиги вакиллари билан туман марказидан 180 километр узоқликда жойлашган қишлоққа бориб, опа-укаларни топдик ва оиласига қайтардик».
Меҳри Йўлдошевага кўра, айни кунда ота туман МИБга олиб келинган ва суд ижросини таъминлаш учун масъул бўлган мутасаддилар томонидан тушунтириш ишлари олиб борилмоқда.
Матбуот брифингида айтилишича, 2019 йилнинг ўтган икки ойи мобайнидаги ўрганишлар натижасида вилоятда 630 та нотинч оила борлиги аниқланган.
Изоҳ (0)