15 февраль куни Telegram’даги «Эхо Узбекистана» каналида Миллий гвардия ҳамда ички ишлар органлари ходимлари томонидан ўтказилган текширув тасвирланган аноним видео эълон қилинди, деб ёзади UZ24.
Видео муаллифининг айтишича, текширув Фарғона вилояти Қўқон шаҳридаги кўнгилочар жойлардан бирида ўтказилган. Аввалига Миллий гвардия ходими бинонинг караоке хонасига кириб, ёстиқ остига пичоқ қўйиб хонадан чиқиб кетади. Кейин ҳамроҳлари билан шу хонага яна кириб, тинтув ўтказади ва пичоқни «топиб олади». Шу тариқа муассаса эгасини тақиқланган буюм топилгани учун айблашади.
Миллий гвардия матбуот хизмати раҳбари Даврон Жуманазаров UZ24’га маълум қилишича, мазкур воқеа 14 февраль куни содир бўлган. Видеодаги йигит ҳақиқатан ҳам Миллий гвардиянинг ҳарбий хизматчиси — Ф.Ш. Раҳбарият ҳолат бўйича ўша вақтнинг ўзидаёқ хабардор қилинган.
«Айни вақтда хизмат текшируви бошланган. Ходим Ф.Ш.га нисбатан қаттиқ жазо чораси қўлланилади ва сафимиздан четлаштирилади», – деди Д. Жуманазаров.
«Фуқароларимиз эътирозларига сабаб бўлувчи салбий хатти-ҳаракатлар содир этган ҳарбий хизматчиларга Миллий гвардия қўмондонлиги томонидан қаттиқ чоралар кўрилади. Миллий гвардия сафларида юрт тинчлиги, халқ осойишталиги учун фидоий хизмат қилиш ҳарбий хизматчиларга уқтирилади ва бунга амал қилиниши қаттиқ талаб қилинади», – қўшимча қилди матбуот хизмати раҳбари.
Изоҳ (0)