Самарқанд шаҳрида 1930 йилда қурилган, «Ҳунармандлар маркази» жойлашган бинода 13 февралга ўтар кечаси ёнғин содир бўлди.
13 февраль куни Самарқанд вилояти куч воситаларни бошқариш ва мувофиқлаштириш марказига соат 2:05 да Самарқанд шаҳар Ислом Каримов кўчаси 46-А-уйда жойлашган, «Ҳунармандлар маркази»да ёнғин содир бўлгани ҳақида маълумот келиб тушган.
«Дарё» мухбири Фарҳод Норбўтаевнинг хабар беришича, воқеа жойига Самарқанд шаҳридан 9 та ёнғин ўчириш жанговор экипажлари юборилган. Бўлинмалар ҳодиса жойига 02:15 да етиб бориб, 03:06 да ёнғинни ўраб олган. 03:55 ёнғин бартараф этилган.
Самарқанд вилоят ИИБ Ёнғин хавфсизлиги бошқарма бошлиғи ўринбосари Илҳом Исмоиловнинг маълум қилишича, бино иккинчи қаватининг 100 квадрат метр фанерли шифти, жиҳозлари ва тунукали томи ёнган.
Олиб борилган саъй-ҳаракатлар натижасида 1930 йилда қурилган бинонинг 500 квадрат метр жойи асраб қолинган.
Ёнғин электр симларини қисқа туташуви натижасида келиб чиққан.
Самарқанд вилояти ИИБ ЁХБ бошлиғи раҳбари воқеа жойига бориб, ёнғин келиб чиқиш сабабларини тўлиқ ўрганган.
Изоҳ (0)