9 февраль, шанба куни футбол бўйича Испания Ла Лигасида 23-турнинг марказий беллашувига Мадрид шаҳри мезбонлик қилади.
Уч кун олдин «Эль-Класико»дан завқ олган футбол мухлислари бу сафар Мадрид дербиси гувоҳига айланади.
Ўйин аҳамияти
Айни дамда Ла Лигада «Барселона» 22 турдан сўнг 50 очко жамғариб, «Атлетико»ни 6, «Реал»ни эса 8 очко ортда қолдирмоқда. Ҳозир на «Атлетико» ва на «Реал» Испания чемпионлиги учун асосий даъвогар ҳисобланмоқда. Улар бугун «Барселона»га ким асосий қаршилик кўрсатиши, аниқроғи ўша қаршиликни тақдим эта олишини исботлаш учун ҳам майдонга чиқишларига тўғри келади. Шундай экан, Мадриднинг иккала жамоасига ҳам 3 очко жуда зарур ва улар бунинг учун борларини беришга шубҳ йўқ.
Таркиблар ҳақида
«Атлетико Мадрид»
Учрашув олдидан «матрасчилар» лазаретидан хушхабар келди. Унга кўра, жамоа ҳимоясининг ишонган тоғи — Диего Годин жароҳатдан тўла фориғ бўлган. Ва бугунги дербига 100 % тайёр. Симеоне хоҳласа, уни бемалол майдонга тушириши мумкин. Бироқ Коке ҳамда Диего Косталар ҳақида бундай деб бўлмайди. Улар ҳамон жароҳатини даволаш билан овора. Катта эҳтимол Костанинг ўрнида бугун «Реал»нинг собиқ ҳужумчиси, қишки трансферлар вақтида «Челси»дан ижарага олиб келинган Альваро Мората ҳаракатланади.
«Реал Мадрид»
«Қироллик клуби» ҳам ҳамшаҳаридан қолишмаган ҳолда бир нечта йўқотишларга учраган. Жумладан, ўзи шундоқ ҳам асосий таркибдаги ўрнини йўқотган Иско машғулотлар чоғида жароҳат олган, у бугунги баҳсни ўтказиб юборади. Шунингдек, «Барселона»га қарши баҳсда жароҳат олиб майдонни эрта тарк этган Маркос Льоренте ҳам жамоасига ёрдам бера олмайди. Сантьяго Солари катта эҳтимол билан «Эль-Класико»дан фойдаланган ҳужум триоси — Винисиус Жуниор—Карим Бензема—Лукас Васкесни Мадрид дербисида ҳам асосий таркибга киритади. «Барселона»га қарши ишончли ўйин кўрсатганига қарамай, Солари томонидан ортиқча вазни сабаб танқид қилинаётган Марсело ўрнида Серхио Регилон ҳаракатланиши мумкин. Шунингдек, ярим ҳимояда Тони Кроос ва Модрич тандемига Дани Себальос кўмаклашиши кутилмоқда.
Умуман олганда, дербиларга хос қизиқарли ўйин кутиш мумкин. «Атлетико»нинг ҳимоявий ўйинидан келиб чиқиб, учрашув тақдирини битта гол ҳам ҳал этиб қўйиш эҳтимоли мавжудлигини рад этиб бўлмайди.
Тахминий таркиблар:
«Атлетико М»: Облак – Ариас, Хименес, Годин, Эрнандес – Корреа, Родриго, Партей, Саул – Мората, Гризманн
«Реал М»: Куртуа – Карвахаль, Варан, Рамос, Регилон – Модрич, Кроос, Себальос – Васкес, Бензема, Винисиус
- «Реал» сўнгги бор «Атлетико Мадрид»ни 2016/17 йилги мавсум Чемпионлар Лигаси ярим финалининг биринчи учрашувида мағлуб этган;
- Ла Лига доирасидаги сўнгги учта учрашувда жамоалар бир-бирига атиги 1 тадан гол урди (0:0, 1:1, 0:0);
- «Атлетико» ўз уйида ўтган сўнгги 7 та ўйиннинг фақат биттасидан ўз дарвозасидан гол олиб чиқди («Атлетико» 3:3 «Жирона»);
- «Реал» Ла Лига доирасида ўтказилган сўнгги 4 та ўйинда ғалаба қозонди.
Солари билан анчадан бери танишмиз. У фаолиятини якунлаган бир вақтда, ахир мен унга мураббийлик қилардим. Биз аргентиналиклармиз, баъзан учрашамиз, баъзан биргаликда тушлик қиламиз. У бош мураббийликка тўғри келадиган инсон деб ўйлайман. Солари аллақачон бу ишни қила олишини ҳаммага исботлаб улгурди. Яна бир аргентиналик шундай юқори даражада ишлаётгани кишини хурсанд қилади.Диего Симеоне «Атлетико» бош мураббийи
«Барселона», «Жирона» ва «Севилья»га қарши ўйнаганимиздек ҳаракат қила олишимизга умид қиламан. «Атлетико» тактик жиҳатда аъло даражада ўйин кўрсатади. Керакли натижага эришиш учун, биз ҳам шундай ўйин кўрсатишимиз лозим.Сантьяго Солари «Реал» бош мураббийи
Ла Лига
23-тур баҳслари
9 февраль, шанба
«Атлетико Мадрид»—«Реал Мадрид» 20:15
Бош ҳакам: Хавьер Эстрада ФернандесЯнада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)