Ўзбекистон бокс федерациясининг биринчи вице-президенти лавозимида ишлаб келган Шерзод Тошматов истеъфога чиқарилади. Бу ҳақда ГоСпорт хабар берди.
2 февраль куни Миллий олимпия қўмитасида йиғилиш бўлиб ўтади. Қайд этилишича, мажлисда Шерзод Тошматов вазифасидан озод қилиниб, бокс федерациясига янги биринчи вице-президент тайинланиши кутилмоқда.
Маълумот учун, Шерзод Тошматов 2014 йилнинг ноябрь ойидан федерацияда фаолият юритиб келади. Федерация президенти Очилбой Раматов бир вақтнинг ўзида Бош вазирнинг биринчи ўринбосари, «Ўзбекистон темир йўллари» АЖ раҳбари, Ўзбекистон футбол федерациясининг президенти бўлгани боис, федерацияни асосан Тошматов бошқариб келган.
Унинг раҳбарлиги даврида ҳаваскорлар бўйича Ўзбекистон бокс терма жамоаси кўплаб муваффақиятларга эришган. Жумладан, Рио—2016 мусобақасида 3та олтин (жами 7та) медаль билан умумжамоа ҳисобида биринчи ўринни эгаллаган. 2018 йилги Осиё ўйинларида эса 5та олтин, 2та кумуш медаллар билан якунда умумжамоа ҳисобида биринчи ўринни, йил якунлари бўйича эса Осиёнинг энг яхши федерацияси номини қўлга киритган.
Шерзод Тошматов 2016 йилнинг 17 декабрида Осиё бокс федерацияси вице-президенти лавозимига ҳам тайинланганди.
Эслатиб ўтамиз, ўтган йили Бокс федерацияси ва Миллий олимпия қўмитаси ўртасидаги келишмовчиликлар бўлиши мумкинлиги ҳақида хабарлар чиққан ва бу борада шов-шувларга сабаб бўлган мақолалар ҳам эълон қилинганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)