2 февраль, шанба куни Миллий олимпия қўмитасида Ўзбекистон бокс федерациясининг ҳисобот сайлов йиғилиши бўлиб ўтди.
Йиғилишда бокс федерациясининг янги вице президенти лавозимига тадбиркор Сакен Пўлатов сайланди.
Сакен Пўлатов бир неча йиллардан буён Тошкентнинг «Локомотив« футбол клуби тизимида(қайси лавозимдалиги маълум эмас) фаолият юритиб келади. Пўлатов 1975 йил Тошкент шаҳрида туғилган. У, шунингдек, «Orient Finans Банк» бошқарув кенгаши раиси ҳисобланади.
Аввалроқ федерациянинг сўнгги тўрт йилликдаги биринчи вице-президенти Шерзод Тошматов истеъфога чиқарилиши ҳақида хабар берилганди. У соғлиғи сабаб йиғилишда иштирок эта олмади.
Шерзод Тошматов 2014 йилнинг ноябрь ойидан федерацияда фаолият юритиб келди. Федерация президенти Очилбой Раматов бир вақтнинг ўзида Бош вазирнинг биринчи ўринбосари, «Ўзбекистон темир йўллари» АЖ раҳбари, Ўзбекистон футбол федерациясининг президенти бўлгани боис, федерацияни асосан Тошматов бошқариб келган.
Унинг раҳбарлиги даврида ҳаваскорлар бўйича Ўзбекистон бокс терма жамоаси кўплаб муваффақиятларга эришган. Жумладан, Рио—2016 мусобақасида 3 та олтин (жами 7 та) медаль билан умумжамоа ҳисобида биринчи ўринни эгаллаган.
2018 йилги Осиё ўйинларида эса 5 та олтин, 2 та кумуш медаллар билан якунда умумжамоа ҳисобида биринчи ўринни, йил якунлари бўйича эса Осиёнинг энг яхши федерацияси номини қўлга киритган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)