3 kun oldin “Barselona” bilan o‘ynagan “Real” bugun “Atletiko Madrid”ni yuta oladimi? (prevyu)

9-fevral, shanba kuni futbol bo‘yicha Ispaniya La Ligasida 23-turning markaziy bellashuviga Madrid shahri mezbonlik qiladi.

Uch kun oldin “El-Klasiko”dan zavq olgan futbol muxlislari bu safar Madrid derbisi guvohiga aylanadi.

O‘yin ahamiyati

Ayni damda La Ligada “Barselona” 22 turdan so‘ng 50 ochko jamg‘arib, “Atletiko”ni 6, “Real”ni esa 8 ochko ortda qoldirmoqda. Hozir na “Atletiko” va na “Real” Ispaniya chempionligi uchun asosiy da’vogar hisoblanmoqda. Ular bugun “Barselona”ga kim asosiy qarshilik ko‘rsatishi, aniqrog‘i o‘sha qarshilikni taqdim eta olishini isbotlash uchun ham maydonga chiqishlariga to‘g‘ri keladi. Shunday ekan, Madridning ikkala jamoasiga ham 3 ochko juda zarur va ular buning uchun borlarini berishga shubh yo‘q.

Tarkiblar haqida

“Atletiko Madrid”

Uchrashuv oldidan “matraschilar” lazaretidan xushxabar keldi. Unga ko‘ra, jamoa himoyasining ishongan tog‘i — Diyego Godin jarohatdan to‘la forig‘ bo‘lgan. Va bugungi derbiga 100 % tayyor. Simeone xohlasa, uni bemalol maydonga tushirishi mumkin. Biroq Koke hamda Diyego Kostalar haqida bunday deb bo‘lmaydi. Ular hamon jarohatini davolash bilan ovora. Katta ehtimol Kostaning o‘rnida bugun “Real”ning sobiq hujumchisi, qishki transferlar vaqtida “Chelsi”dan ijaraga olib kelingan Alvaro Morata harakatlanadi.

“Real Madrid”

“Qirollik klubi” ham hamshaharidan qolishmagan holda bir nechta yo‘qotishlarga uchragan. Jumladan, o‘zi shundoq ham asosiy tarkibdagi o‘rnini yo‘qotgan Isko mashg‘ulotlar chog‘ida jarohat olgan, u bugungi bahsni o‘tkazib yuboradi. Shuningdek, “Barselona”ga qarshi bahsda jarohat olib maydonni erta tark etgan Markos Lyorente ham jamoasiga yordam bera olmaydi. Santyago Solari katta ehtimol bilan “El-Klasiko”dan foydalangan hujum triosi — Vinisius Junior—Karim Benzema—Lukas Vaskesni Madrid derbisida ham asosiy tarkibga kiritadi. “Barselona”ga qarshi ishonchli o‘yin ko‘rsatganiga qaramay, Solari tomonidan ortiqcha vazni sabab tanqid qilinayotgan Marselo o‘rnida Serxio Regilon harakatlanishi mumkin. Shuningdek, yarim himoyada Toni Kroos va Modrich tandemiga Dani Sebalyos ko‘maklashishi kutilmoqda.

Umuman olganda, derbilarga xos qiziqarli o‘yin kutish mumkin. “Atletiko”ning himoyaviy o‘yinidan kelib chiqib, uchrashuv taqdirini bitta gol ham hal etib qo‘yish ehtimoli mavjudligini rad etib bo‘lmaydi.

Taxminiy tarkiblar:

• “Real” so‘nggi bor “Atletiko Madrid”ni 2016/17-yilgi mavsum Chempionlar Ligasi yarim finalining birinchi uchrashuvida mag‘lub etgan;
• La Liga doirasidagi so‘nggi uchta uchrashuvda jamoalar bir-biriga atigi 1 tadan gol urdi (0:0, 1:1, 0:0);
• “Atletiko” o‘z uyida o‘tgan so‘nggi 7 ta o‘yinning faqat bittasidan o‘z darvozasidan gol olib chiqdi (“Atletiko” 3:3 “Jirona”);
• “Real” La Liga doirasida o‘tkazilgan so‘nggi 4 ta o‘yinda g‘alaba qozondi.

Solari bilan anchadan beri tanishmiz. U faoliyatini yakunlagan bir vaqtda, axir men unga murabbiylik qilardim. Biz argentinaliklarmiz, ba’zan uchrashamiz, ba’zan birgalikda tushlik qilamiz. U bosh murabbiylikka to‘g‘ri keladigan inson deb o‘ylayman. Solari allaqachon bu ishni qila olishini hammaga isbotlab ulgurdi. Yana bir argentinalik shunday yuqori darajada ishlayotgani kishini xursand qiladi.

Diyego Simeone “Atletiko” bosh murabbiyi

“Barselona”, “Jirona” va “Sevilya”ga qarshi o‘ynaganimizdek harakat qila olishimizga umid qilaman. “Atletiko” taktik jihatda a’lo darajada o‘yin ko‘rsatadi. Kerakli natijaga erishish uchun, biz ham shunday o‘yin ko‘rsatishimiz lozim.

Santyago Solari “Real” bosh murabbiyi