Жанубий Кореянинг «Гвангжу» клуби «Бунёдкор» ҳимоячиси Рустам Ашурматов билан шартнома тузганини эълон қилди, деб ёзади «Championat.asia».
«Менга »Гвангжу« ўйин услуби ёқди. Янги жамоамга тезроқ қўшилиш ва ўзимнинг яхши ўйинларимни намойиш этишни истайман», — дейди Ашурматов клуб расмий сайтига.
Маълумот учун, «Гвангжу» Жанубий Корея К-2 лигасида иштирок этади. Айни пайтда жамоани маҳаллий мураббий Парк Жин Суб бошқариб бормоқда. Ўтган мавсум ушбу клуб сафида бразилиялик Жил, Фелипе Силва ва Робсон каби легионерлар тўп сурди. Бундан ташқари ўзбек футбол мухлисларига яхши таниш бўлган япониялик Сато Минори(«Бунёдкор»да тўп сурганди) ҳам 2018 йилни «Гвангжу» сафида ўтказди.
Жамоа ўз уй ўйинларини 40245 мухлисга мўлжалланган «Gwangju World Cup» стадионида ўтказади. Бу стадионда 2002 йилги мундиал баҳслари бўлиб ўтган. Жанубий Корея К-2 лигасида янги мавсум 2 март куни старт олади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)