Солиқ тизимида замонавий ахборот-коммуникация технологиялари имкониятларидан кенг фойдаланилмоқда, деб хабар берди Тошкент вилояти солиқ бошқармаси матбуот хизмати.
Ўзбекистон Республикаси Вазирлар Маҳкамасининг 2018 йил 6 октябрдаги «Солиқ маъмуриятчилигида замонавий ахборот-коммуникация технологияларини қўллашни кенгайтириш чора-тадбирлари тўғрисида»ги 807-сонли қарорига асосан Тошкент вилоятининг Чирчиқ шаҳрида ҳамда Навоий ва Сирдарё вилоятлари ҳудудида ҳисобварақ-фактурани тажриба тариқасида электрон усулда жорий этиш йўлга қўйилди.
Сервис ва хизмат кўрсатиш тармоқларидаги корхоналар фаолиятига татбиқ этилаётган ушбу замонавий усул тадбиркорларнинг ортиқча оворагарчиликларини олдини олади, харажатларини камайтиради.
Бугунги кунда Чирчиқ шаҳрида 154 та сервис ва хизмат кўрсатиш фаолияти билан шуғулланувчи корхоналар бўлса, уларнинг 85 фоизи ҳисобварақ-фактураларни электрон тарзда топшириш тизимига ўтди. Қолган 39 та корхона эса бевосита аҳолига нақд пул ва пластик карточкалар орқали товар-хизматларни реализация қилувчи хўжалик субъектларидир.
Чирчиқ шаҳрида жорий йилнинг 6 февраль кунига қадар ўтказилган тарғибот-ташвиқот ишлари натижасида 347 та корхона томонидан умумий қиймати 63,7 миллиард сўмга тенг бўлган 5 774 та ҳисобварақ-фактуралар электрон тарзда жўнатилди.
«Ҳозирда корхонамиздан ҳисобварақ-фактурани электрон тарзда жўнатаяпмиз. Бу тизимнинг қулайлиги шундаки, ўз иш жойимиздан туриб корхоналарга ҳисобварақ-фактураларни тезкор тарзда жўната оламиз, бунинг учун электрон калит ва интернетга уланган компьютер бўлса кифоя. Давлат солиқ хизмати органлари томонидан биз каби солиқ тўловчилар учун яратилган ушбу имкониятнинг афзалликларини амалда билиб, тушуниб бораяпмиз. Шу вақтгача товар-моддий бойликларимизни сотиб олаётганимизда қоғозли ҳисобварақ-фактуралардан фойдаланар эдик ва уларни узоқ сақлаш, зарур пайтда тезкор излаб топишда ортиқча вақт сарфлар эдик. Эндиликда электрон тарзда юборилган ҳисобварақ-фактуралар базада сақланиб, уни керакли пайтда топиш мумкин», – дейди бухгалтер Шамсия Мирзажонова.
Ҳисобварақ-фактураларнинг электрон усули солиқ идораларига ҳам қатор қулайликларни яратади. Хусусан, хўжалик юритувчи субъектларнинг ташқи манбасини аниқлаш, корхоналар ўртасидаги муносабатлар шаффофлигини таъминлаш имконини беради.
Тадбиркорлик субъектлари билан ўтказилаётган семинарларда ҳисобварақ-фактураларни электрон усулда топширишнинг афзалликлари хусусида тушунчалар бериб борилмоқда.
Изоҳ (0)