«Дарё» мухбири Миролим Исажонов Андижон туманидаги 11-мактабгача таълим муассасасидаги шароитлар билан танишди.
Андижон туманидаги боғча чиндан ҳам аянчли аҳволда
Кеча Facebook ижтимоий тармоғидаги гуруҳларнинг бирига «Фарзандларимиз аянчли ҳолатдаги боғчага қатнамоқда» сарлавҳаси остида расмларга илова сифатида қуйидагича пост жойлаштирилди: «Андижон туманидаги 11-мактабгача таълим муассасасига боламни жойлагани борган эдим. У ерда болалар жуда ҳам аянчли ҳолатда эканига гувоҳ бўлдим. Мудиранинг айтишича, боғча таъмир рўйхатига киритилган экан, аммо негадир рўйхатдан чиқариб юборилибди. Боғча ҳожатхонасини икки марта сел оқизиб кетган экан, мудира ўз ҳисобидан таъмирлатибди. Болаларни ‘эртамиз эгалари’ деб таърифлаймиз. Эртамиз эгалари мана шундай шароитда тарбияланадими?» Мазкур фикр-мулоҳазалар интернет фойдаланувчилари орасида кенг муҳокамаларга сабаб бўлиб, бизни ҳам ушбу боғча сари йўл олишга ва асл манзара қандай эканлигига ишонч ҳосил қилишга ундади.
Боғчага айланган меҳмонхона
Андижон туманининг Бўтақара қишлоғидаги «Оқровот» маҳалласида жойлашган ушбу муассасага кечга яқин ташриф буюрганлигимиз боис ота-оналар фарзандларини боғчадан олиб кетишаётгани устидан чиқиб қолдик. Тарбиячилар мудира Маҳбубахон Холботированинг бошқармага иш юзасидан кетганлигини таъкидлашди.
MTM ходимларининг айтишича, мазкур бино 1954 йилда қадр ростлаган. Дастлаб, колхоз меҳмонхонаси сифатида хизмат кўрсатган. 1968 йилдан бошлаб эса бу ерда боғча фаолияти йўлга қўйилган. Ҳозирда 11-MTMда 77 нафар кичкинтой 3 гуруҳда тарбияланмоқда. Уларнинг барчаси шу қишлоқдаги 5 та — «Наврўз», «Оқровот», «Мустақиллик», «Бешпаҳлавон», «Маъориф» маҳалланинг фарзандлари. 18 нафар ходимнинг 5 нафари тарбиячи вазифасида ишлайди.
«Ёмғир ёғишидан безиллаганмиз»
Ўнлаб ота-оналар билан бирга боғча хоналарини кўздан кечирар эканмиз, ҳолат чиндан ҳам кишини ҳайратга солишига амин бўлдик.
— Очиғи, ёмғир ёғишидан безиллаб қолганмиз, — дейди тарбиячилардан бири. — Кўриб турганингиздек томдан чакки ўтавериб, деворлар хунук ҳолатга келиб қолган. Тахталар эскилиги учун полларнинг кўп қисми тешик. Шу боис линолеумлар ёзиб қўйганмиз. Болалар айвончаларидаги ҳолат ҳам худди шунақа. Мудира бошчилигида имкон қадар камчиликларни тўғрилаб, яхши шароит яратиб ишлаяпмиз. Аммо бу қачонгача давом этади? Бинонинг қурилганига ҳам анча бўлган. Ишонсангиз, кўплаб ота-оналар фарзандини олиб келишади. Лекин баъзилари шароитларимиздан қониқмайди. Сабаби бизда инглиз, рус тили тўгараклари йўқ, штатлар ажратилмаган. Жой озлиги учун кўп болаларни ололмаймиз. Замонавий боғча қурилса, бутун қишлоқ аҳли хурсанд бўлиши аниқ.
«Интернетга чиқаришгани яхши бўлибди»
Бизнинг ташрифимиздан хурсанд бўлган ота-оналарнинг айримларини суҳбатга чорладик.
Мавлудахон Мамажонова, 67 ёш:
— Шу маҳаллада истиқомат қиламан. Бу боғчада фарзандларим катта бўлишди. Ҳозир невараларим тарбияланяпти. Хоналари иссиқ, болаларга ош-овқат вақтида берилади. Озодалиги яхши. Лекин ёмғир ёқса, томдан сув оқади. Бундан жуда хавотирланамиз. Икки марта боғча давлат дастурига киритилганини айтиб, бизни алдашди. Декабрда вилоят ҳокимининг олдига уч-тўрт нафар ота-она бир бўлиб бордик. Аммо ҳокимнинг ҳузурига киришимизга рухсат беришмади. Агар ҳоким боғчадаги ҳолатдан хабар топса, бизга тезда ёрдам беришига ишонамиз. Лекин арзларимиз унга етиб бормаяпти. Интернетга қайси ота-она чиқариб юборган бўлса, жуда яхши бўлибди. Ахир 65 йил олдин қурилган бинода эртамиз эгалари қачонгача тарбияланади? Мутасадди раҳбарлар қишлоғимиз муаммосига ечим топишда яқиндан ёрдам беришса, жуда ҳам қувонардик.
«Каравотларнинг аҳволини қаранг!»
Иродахон Раҳмонова:
— Уч фарзандим мактабга боргунча шу боғчага қатнади. Ҳозир тўрт ёшли қизимни олиб келамиз. Овсинимни эса икки нафар фарзанди шу ерда юради. Телевизорда шароитлари зўр боғчаларни кўриб, очиғи ҳавас қиламиз. Бу ердаги каравотларни аҳволини қаранг. Қўшни қишлоқдаги боғчага олиб борсак бўлади. Лекин ҳар куни йўл кирага кўп пул кетади, вақтдан ҳам ютқазамиз. Президентимиз чекка қишлоқдаги боғчаларни яхшилаш бўйича кўп гапирганини телевизорда кўрамиз. Лекин бу бино ҳамон тўғриланмаганлиги бизни ажаблантиради.
«Маҳаллий бюджетдан қайта қурилиши режалаштирилган»
Ота-оналар билан суҳбатлашгач, туман MTM бўлими мудири Дилфузахон Мусаева билан боғландик:
— Тумандаги 7 та боғчани бу йилги инвестиция дастурига киритиш учун тавсия қилганмиз. Улар ичида ушбу боғча ҳам бор эди. Шулардан 4 таси тасдиқланди. Кўрган бўлсангиз, 11-MTM бутунлай бузилиб, қайта қуриладиган ҳолатда. Вилоят ҳокимига таклиф киритганимизда, ушбу муассаса ҳам маҳаллий бюджетдан қуриладиган боғчалар орасида биринчи ўринда қайта бунёд этиладиган бўлди. Тез кунларда лойиҳа ишлари ниҳоясига етиб, қурилиш ишлари бошланиши режалаштирилган.
Биз мазкур мавзуга яна қайтамиз...
Изоҳ (0)