«Ўзбекистонни ривожлантириш банки» ташкил этилади. Банкка Президент томонидан 500 млн доллар ажратилади

Ўзбекистон Президенти Шавкат Мирзиёев томонидан Марказий банкка «Ўзбекистонни ривожлантириш банки»ни ташкил этиши топшириғи берилди. Бу ҳақда Марказий Банк бошқарув раиси Мамаризо Нурмуродов Халқаро пресс клубнинг бугун, 6 февраль куни бўлиб ўтган сессиясида маълум қилди, деб хабар берди «Дарё» мухбири Севара Нишонова.

«Банкнинг энг муҳим вазифаларидан бири сифатида экспортни ривожлантириш белгиланган. Шунингдек, банк экспортни молиявий қўллаб-қувватлаш, экспорт қилиш учун иқтисодий шарт-шароитлар яратиш билан шуғулланади. Ушбу мақсадлар учун Президент томонидан 500 миллион доллар маблағ ажратилади. Бу энг аввало экспорт салоҳиятига эга бўлса-да, экспортга имконият бермаётган молиявий тўсиқларга барҳам беришни кўзда тутади. Логистика масалалари, маҳсулот сақлайдиган омборлар ташкил этиш каби ишларга мана шу маблағларни йўналтирамиз», — дейди Марказий банк бошқарув раиси.

Савдо-саноат палатаси раиси Адҳам Икромов бугунги кунда экспорт билан шуғулланувчи тадбиркорлар дуч келаётган муаммолар ҳақида гапириб ўтди.

«Экспорт бир неча масалаларга боғлиқ. Ҳозир тадбиркорни қийнайдиган масала бу — божхона тарифларини тартибга солиш масаласи. Демак, биз ўзимизнинг ички бозоримизда фаолият юритадиган тадбиркорни ҳам ҳимоя қилишимиз керак. Лекин шу билан бирга ташқи бозорларни топиш учун бизга янги технология керак.

Ҳозирги кунда хорижий инвесторларга катта имкониятлар яратилган. Бироқ божхона тарифларини тартибга солиш масаласи туфайли тадбиркорлар чет элдан асбоб-ускуналарни олиб киришда айрим бюрократик тўсиқларга дуч келмоқда. Бу борада ўтган йили бизнинг Call-марказимизга 47 мингта мурожаатлар бўлди. Январь ойида эса 3325 та муаммоли мурожаатлар қабул қилинган. Шу мурожаатларнинг 20 фоизи экспорт масаласида бўлган».