2 февраль куни соат 21:00 атрофида ИИВ Транспортда жамоат хавфсизлигини таъминлаш бошқармаси «Ангрен» ва «Апартак» кўмир конларини қўриқлаш алоҳида отряди навбатчилик қисмига ўғирлик ҳолати юзасидан хабар келиб тушган. Бу ҳақда ИИВ жамоатчилик ва ОАВ билан алоқалар бошқармаси маълум қилди.
Шу куни 18:00ларда Ангрен шаҳри, Беруний маҳалласида яшовчи Ҳасан Одиматов, Дилмурод Мирзабаев ва Анвар Кушматов ўзаро тил бириктириб, «Ўзбеккўмир» АЖга қарашли «Апартак» кўмир кони ҳудудига айланма йўллар орқали ноқонуний киради. Тахминан 600 килограмм кўмирни 6 бош уй ҳайвонининг устига махсус ясалган саватчага юклаб, чиқиб кетаётганларида отряднинг мобил гуруҳи ходимлари томонидан қўлга олинади.
Ушбу фуқароларга нисбатан Маъмурий жавобгарлик тўғрисидаги кодекснинг тегишли моддасига мувофиқ ҳужжатлар расмийлаштирилди. Ҳолат юзасидан суриштирув ишлари олиб борилмоқда.
Изоҳ (0)