“Daryo” muxbiri Mirolim Isajonov Andijon tumanidagi 11-maktabgacha ta’lim muassasasidagi sharoitlar bilan tanishdi.
Andijon tumanidagi bog‘cha chindan ham ayanchli ahvolda
Kecha Facebook ijtimoiy tarmog‘idagi guruhlarning biriga “Farzandlarimiz ayanchli holatdagi bog‘chaga qatnamoqda” sarlavhasi ostida rasmlarga ilova sifatida quyidagicha post joylashtirildi: “Andijon tumanidagi 11-maktabgacha ta’lim muassasasiga bolamni joylagani borgan edim. U yerda bolalar juda ham ayanchli holatda ekaniga guvoh bo‘ldim. Mudiraning aytishicha, bog‘cha ta’mir ro‘yxatiga kiritilgan ekan, ammo negadir ro‘yxatdan chiqarib yuborilibdi. Bog‘cha hojatxonasini ikki marta sel oqizib ketgan ekan, mudira o‘z hisobidan ta’mirlatibdi. Bolalarni ‘ertamiz egalari’ deb ta’riflaymiz. Ertamiz egalari mana shunday sharoitda tarbiyalanadimi?” Mazkur fikr-mulohazalar internet foydalanuvchilari orasida keng muhokamalarga sabab bo‘lib, bizni ham ushbu bog‘cha sari yo‘l olishga va asl manzara qanday ekanligiga ishonch hosil qilishga undadi.
Bog‘chaga aylangan mehmonxona
Andijon tumanining Bo‘taqara qishlog‘idagi “Oqrovot” mahallasida joylashgan ushbu muassasaga kechga yaqin tashrif buyurganligimiz bois ota-onalar farzandlarini bog‘chadan olib ketishayotgani ustidan chiqib qoldik. Tarbiyachilar mudira Mahbubaxon Xolbotirovaning boshqarmaga ish yuzasidan ketganligini ta’kidlashdi.
MTM xodimlarining aytishicha, mazkur bino 1954-yilda qadr rostlagan. Dastlab, kolxoz mehmonxonasi sifatida xizmat ko‘rsatgan. 1968-yildan boshlab esa bu yerda bog‘cha faoliyati yo‘lga qo‘yilgan. Hozirda 11-MTMda 77 nafar kichkintoy 3 guruhda tarbiyalanmoqda. Ularning barchasi shu qishloqdagi 5 ta — “Navro‘z”, “Oqrovot”, “Mustaqillik”, “Beshpahlavon”, “Ma’orif” mahallaning farzandlari. 18 nafar xodimning 5 nafari tarbiyachi vazifasida ishlaydi.
“Yomg‘ir yog‘ishidan bezillaganmiz”
O‘nlab ota-onalar bilan birga bog‘cha xonalarini ko‘zdan kechirar ekanmiz, holat chindan ham kishini hayratga solishiga amin bo‘ldik.
— Ochig‘i, yomg‘ir yog‘ishidan bezillab qolganmiz, — deydi tarbiyachilardan biri. — Ko‘rib turganingizdek tomdan chakki o‘taverib, devorlar xunuk holatga kelib qolgan. Taxtalar eskiligi uchun pollarning ko‘p qismi teshik. Shu bois linoleumlar yozib qo‘yganmiz. Bolalar ayvonchalaridagi holat ham xuddi shunaqa. Mudira boshchiligida imkon qadar kamchiliklarni to‘g‘rilab, yaxshi sharoit yaratib ishlayapmiz. Ammo bu qachongacha davom etadi? Binoning qurilganiga ham ancha bo‘lgan. Ishonsangiz, ko‘plab ota-onalar farzandini olib kelishadi. Lekin ba’zilari sharoitlarimizdan qoniqmaydi. Sababi bizda ingliz, rus tili to‘garaklari yo‘q, shtatlar ajratilmagan. Joy ozligi uchun ko‘p bolalarni ololmaymiz. Zamonaviy bog‘cha qurilsa, butun qishloq ahli xursand bo‘lishi aniq.
“Internetga chiqarishgani yaxshi bo‘libdi”
Bizning tashrifimizdan xursand bo‘lgan ota-onalarning ayrimlarini suhbatga chorladik.
Mavludaxon Mamajonova, 67 yosh:
— Shu mahallada istiqomat qilaman. Bu bog‘chada farzandlarim katta bo‘lishdi. Hozir nevaralarim tarbiyalanyapti. Xonalari issiq, bolalarga osh-ovqat vaqtida beriladi. Ozodaligi yaxshi. Lekin yomg‘ir yoqsa, tomdan suv oqadi. Bundan juda xavotirlanamiz. Ikki marta bog‘cha davlat dasturiga kiritilganini aytib, bizni aldashdi. Dekabrda viloyat hokimining oldiga uch-to‘rt nafar ota-ona bir bo‘lib bordik. Ammo hokimning huzuriga kirishimizga ruxsat berishmadi. Agar hokim bog‘chadagi holatdan xabar topsa, bizga tezda yordam berishiga ishonamiz. Lekin arzlarimiz unga yetib bormayapti. Internetga qaysi ota-ona chiqarib yuborgan bo‘lsa, juda yaxshi bo‘libdi. Axir 65 yil oldin qurilgan binoda ertamiz egalari qachongacha tarbiyalanadi? Mutasaddi rahbarlar qishlog‘imiz muammosiga yechim topishda yaqindan yordam berishsa, juda ham quvonardik.
“Karavotlarning ahvolini qarang!”
Irodaxon Rahmonova:
— Uch farzandim maktabga borguncha shu bog‘chaga qatnadi. Hozir to‘rt yoshli qizimni olib kelamiz. Ovsinimni esa ikki nafar farzandi shu yerda yuradi. Televizorda sharoitlari zo‘r bog‘chalarni ko‘rib, ochig‘i havas qilamiz. Bu yerdagi karavotlarni ahvolini qarang. Qo‘shni qishloqdagi bog‘chaga olib borsak bo‘ladi. Lekin har kuni yo‘l kiraga ko‘p pul ketadi, vaqtdan ham yutqazamiz. Prezidentimiz chekka qishloqdagi bog‘chalarni yaxshilash bo‘yicha ko‘p gapirganini televizorda ko‘ramiz. Lekin bu bino hamon to‘g‘rilanmaganligi bizni ajablantiradi.
“Mahalliy budjetdan qayta qurilishi rejalashtirilgan”
Ota-onalar bilan suhbatlashgach, tuman MTM bo‘limi mudiri Dilfuzaxon Musayeva bilan bog‘landik:
— Tumandagi 7 ta bog‘chani bu yilgi investitsiya dasturiga kiritish uchun tavsiya qilganmiz. Ular ichida ushbu bog‘cha ham bor edi. Shulardan 4 tasi tasdiqlandi. Ko‘rgan bo‘lsangiz, 11-MTM butunlay buzilib, qayta quriladigan holatda. Viloyat hokimiga taklif kiritganimizda, ushbu muassasa ham mahalliy budjetdan quriladigan bog‘chalar orasida birinchi o‘rinda qayta bunyod etiladigan bo‘ldi. Tez kunlarda loyiha ishlari nihoyasiga yetib, qurilish ishlari boshlanishi rejalashtirilgan.
Biz mazkur mavzuga yana qaytamiz...
Izoh (0)