Ўзбекистон футбол ассоциацияси ўтган мавсумни «Навбаҳор» сафида якунлаган ва айни вақтда кимга тегишли эканлигини ўзи ҳам билмаётган Азиз Турғунбоев масаласини ўрганиб чиқади. Бу ҳақда ПФЛ расмий хабар берди.
Қайд этилишича, Турғунбоевнинг ПФЛ рўйхатидан ўтказилган ва «Навбаҳор»га тегишли бўлган шартномаси 2018 йилнинг ноябрь ойи сўнгида ўз кучини йўқотган.
«Навбаҳор» ва «Пахтакор» футбол клублари 2018 йилнинг сўнгги ойида футболчини ПФЛ рўйхатидан ўтказишга уриниб кўрган, бироқ трансфер ойнаси 17 декабрь санасида очилишидан келиб чиқиб, ПФЛ ҳар икки томон шартномасини ҳам қабул қилмаган.
2019 йил 22 январь куни «Пахтакор» Азиз Турғунбоев билан 1 январь куни тузилган шартномани Осиё Чемпионлар Лигаси учун рўйхатдан ўтказишга ПФЛга олиб борган.
28 январь куни эса «Пахтакор» вакиллари мазкур шартномага имзо қўйган Азиз Турғунбоев айни дамда «Навбаҳор» сафида хориж йиғинида иштирок этаётгани юзасидан шикоят аризаси билан ПФЛ бош директорига мурожаат йўллаган.
Кейин эса мазкур шикоят аризаси ПФЛ томонидан ЎФАнинг «Футболчиларнинг мақоми ва ўтиши бўйича» қўмитага оширилиб юборилган.
ПФЛ хабарида қайд этилишича, комиссия тез кунлар ичида бу масала юзасидан иш бошлайди.
Маълум бўлишича, унда «Навбаҳор» ва «Пахтакор» футбол клублари бош ҳамда спорт директорлари, Азиз Турғунбоевнинг ўзи ва масала юзасидан маълумотга эга дея тахмин қилинаётган бошқа шахслар иштирок этади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)