Наманганда МИБ кўмагида 2 мингдан ортиқ оиланинг турмуши тикланди
Мажбурий ижро бюроси Наманган вилоят бошқармаси томонидан алимент билан боғлиқ суд ижро ҳужжатлари ижросини таъминлашда тизимли чора-тадбирлар кўрилмоқда. Бу ҳақда «Дарё»га бошқарма жамоатчилик билан алоқалар ва хуқуқий ахборот бўлими маълум қилди.
Хусусан, бюронинг шаҳар ва туман бўлимлари томонидан маҳалла фуқаролар йиғинларида ўтказилаётган тадбирларда алимент соҳасидаги қонунчиликка киритилган ўзгартиришлар ҳақида тушунчалар бериб келинмоқда. Жумладан, Косонсой туманидаги Маҳдуми Аъзам маҳалласида ўтказилган тадбирдан сўнг Қобилжон Аллаев ва Марҳабо Мамажановалар оиласи ярашишга қарор қилди.
Ушбу оила 2018 йилда ажрашиб кетган эди. Фуқаролик ишлари бўйича Янгиқўрғон туманлараро судининг 2018 йил 21 май кунидаги ижро ҳужжати бўйича қарздор Комилжон Аллаев ундирувчи Марҳабо Мамажанова фойдасига вояга етмаган 2 нафар фарзандининг моддий таъминоти учун алимент ундириш тўғрисидаги ижро ҳужжати туман бўлими иш юритувига келиб тушган. Ушбу оиланинг яраштириш орқали бўлим ижро юритувидаги иш тамомланди. Умуман, 2018 йил давомида туманда МИБ кўмагида жами 145 та оила яраштирилган.
Бюронинг Чортоқ тумани бўлими томонидан алимент ундириш билан боғлиқ ижро ҳужжатлари ижроси юзасидан 2018 йил давомида ишлаб чиқилган йўл харитаси бўйича маҳалла фуқаролар йиғинлари кесимида тарғибот ва тушунтириш ишлари олиб борилди. Натижада ўтган йилда 84 та оилани яраштиришга эришилди. Шунингдек, 1312 та ижро ҳужжати бўйича 847 миллион сўм алимент ундириб берилди.
МИБ саъй-ҳаракатлари билан 2018 йил давомида вилоятда 2074 та оила тикланиб, алимент ундириш тўғрисидаги ижро ҳужжатлари иш юритувидан тугатилган.
