Шавкат Мирзиёевнинг Жиззахга ташрифи, Ислом Каримовнинг таваллуд куни, Ўзбекистондаги илк ёпиқ тоғ-чанғи мажмуаси ва куннинг бошқа муҳим хабарлари

30 январнинг эътиборга молик хабарлари — «Дарё» дайжестида.

Президент Шавкат Мирзиёев 30 январь куни Жиззах вилоятига ташриф буюрди.

Дастлаб Шавкат Мирзиёев Фориш туманида атом электр станциясини қуриш учун муҳандислик тадқиқотлари олиб борилаётган майдонлардан бирини кўздан кечирди.

Сўнг Президент Фориш туманидаги базальт тошини қайта ишлайдиган қўшма корхона билан танишди.

Шунингдек, Мирзачўл туманида «Обод қишлоқ» дастури доирасида амалга оширилган ишларни кўздан кечирди.

Ундан кейин Президент Мирзачўл туманидаги Ўзбек – қозоқ миллий маданият маркази фаолияти билан танишди.

Бундан ташқари, Мирзачўл туманидаги болалар боғчасини ва марказий поликлиникани бориб кўрди.

***

30 январь куни Ўзбекистон Биринчи Президенти Ислом Каримовнинг таваллуд куни мамлакатда кенг нишонланди.

Шавкат Мирзиёев 30 январь куни Тошкент шаҳрида Ислом Каримов ҳайкали пойига гулчамбар қўйди. Сўнг  Ислом Каримовни хотирлаш тадбирларида иштирок этиш учун Самарқанд шаҳрига жўнаб кетди.

Самарқандда Ислом Каримов таваллудига бағишланган хотира тадбирлари ўтказилди, Ислом Каримов ҳайкали пойига гуллар қўйилди.

Шунингдек, Қашқадарё вилоят ҳокимлиги ёнида қад ростлаган Ўзбекистоннинг Биринчи Президенти Ислом Каримов ҳайкали пойига гулчамбарлар қўйилди.

Шу куни Ўзбекистонда «Ислом Каримов. Бошқа ҳеч қачон» қисқа метражли ҳужжатли фильми тақдим этилди.

***

1 февраль куни Ўзбекистондаги илк ёпиқ тоғ-чанғи мажмуаси очилади.

Ice City — бир йил ичида қуриб битказилган ўзига хос парк. Мажмуа ўзининг турли хил аттракционлари ва энг асосийси табиий қори билан ҳам жуда ноёб ҳисобланади. Бу ерда қиш тафтини ҳаттоки ёз фаслида ҳам ҳис этиш мумкин. Энг ажабланарлиси, мажмуада ҳаво ҳарорати +18 даражани ташкил этади.

***

Гулнора Каримованинг қизи Каримовлар оиласида туғилиш масъулияти ва холаси билан муносабатлари ҳақида сўзлаб берди.

Имон Каримова фолловерларининг бири Каримовлар оиласида туғилишнинг минус ва плюслари қандайлиги сўралган. Унга жавобан қиз, буни танлаш имкони йўқлигини, бариси ташқаридан кўринганчалик эмаслигини маълум қилган.

***

«Ундан эшитган сўзларни ҳаттоки энг қўпол эркаклардан ҳам эшитмаганман». 38 ёшли фирибгар аёлдан жабрланганлар кўрсатма берди.

Шаҳноза Бойқунусованинг жиноий ҳаракатларидан жабрланганлар ва унинг интернет тармоғидаги хабарларидан ғазабланганлар Тошкент шаҳар ИИББ Ахборот мультимедиа марказига интервью беришга рози бўлиб, ўз фикрларини билдирди.