Хитойнинг Ханчжоу шаҳридаги иккита компания 30 ёшдан ошган турмушга чиқмаган аёл ходимларига саккиз кунлик таътил тақдим этди. Мазкур таътил Хитой Янги йили вақтида давлат томонидан белгиланган етти кунлик дам олишга қўшимча тарзда берилган. Қўшимча дам олиш кунларини аёллар шахсий ҳаёт қуриш учун сарфлаши кўзланган. Бу ҳақда TJournal хабар берди.
Компаниялардан бирининг ходимлар бўйича менежери айтишича, таътилга эга бўлган ходималар бу қарорни кўтаринкилик билан қарши олган. Компанияда аёллар ва эркаклар сони тенг, бироқ аёллар асосан ички бўлимларда ишлагани учун йигитлар билан танишиш имкониятига эга эмас.
Хитойда 30 ёшдан ошган турмушга чиқмаган аёлларга салбий муносабатда бўлинади ва уларни кўрсатиш учун «қолиб кетган» деган маънони англатувчи сўз ишлатилади. Бу 25 ёшдан кейин турмушга чиқиш қийин деган фикр билан боғланган. Шу билан бирга, Хитойда бутунжаҳон тенденцияси кузатилмоқда. Унга кўра, аёллар кўпроқ карьерага эътибор қаратмоқда ва анъанавий ёшдан кечроқ турмушга чиқади ёки умуман турмуш қурмасликни маъқул кўради.
Изоҳ (0)