Наманган шаҳридаги Ёшлар марказида хорижда ишлаб қайтган ёшлар билан очиқ мулоқот ўтказилди. Бу ҳақда «Дарё» мухбири хабар бермоқда.
Ёшлар иттифоқи Наманган вилоят кенгашининг раиси Абдулазиз Мўминовнинг таъкидлашича, мазкур мулоқотдан кўзда тутилган мақсад хориждан қайтган ёшлар билан юзма-юз суҳбатлашиб, уларнинг режалари билан танишиш, уларни рўёбга чиқаришга кўмаклашишдан иборат.
Вилоят Бандликка кўмаклашиш бош бошқармаси вакили Камолхон Юсуповга кўра, Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси томонидан қийин ҳолатдаги юртдошларни Ўзбекистонга қайтариш чоралари кўрилмоқда. Мазкур чоралар туфайли келгусида 300 нафарга яқин ёшнинг вилоятга қайтиши режалаштирилган.
Тадбирда «Хорижда ишлаш учун кетаётган ва яшаш манзилларга қайтган ёшларнинг саломатлиги ва гигиена қоидалари», «Эътиқод, иймон ва диний тарбия: ёшларнинг диний ва дунёвий билимларини ошириш», «Тадбиркорлик ва шахсий бизнесни йўлга қўйиш учун имкониятлар», «Шахсий томорқадан самарали фойдаланиш, деҳқончилик фаолиятидан юқори даромад олиш йўллари» мавзулари бўйича маърузалар тингланди.
Ёшлар учун бепул тиббий кўрик, меҳнат ярмаркаси, ҳунарманд ва тадбиркорларнинг кўргазмалари ташкил этилди.
Очиқ мулоқот доирасидаги ярмаркада Наманган шаҳридаги корхона ва ташкилотлар 360 та бўш иш ўрни билан иштирок этди. Унда хориждан қайтган 51 нафар йигит-қиз ишга йўлланма олди, 13 нафари шу ернинг ўзида ишга қабул қилинди.
Изоҳ (0)