Республика Ветеран уюшмаси ташкил топганининг 25 йиллик санаси ва собиқ иттифоқ қўшинларининг Афғонистондан чиқарилганига 30 йил тўлиши муносабати билан Тошкентда байналминал-жангчилар билан ишлашга қаратилган қатор тадбирлар ўтказилади. Бу ҳақда уюшма раиси Талъат Муродовга таяниб, Sputnik хабар берди.
Жумладан, Тошкентда МДҲ давлатлари ҳукуматлари раҳбарлари кенгаши қошидаги байналминал-жангчилар масалалари бўйича мувофиқлаштириш кенгаши мажлиси ўтказилади. Йиғилишда Собиқ Иттифоқ Қаҳрамони Руслан Аушев, «Боевое братство» Бутунроссия ветеранлар жамоатчилик ташкилоти етакчиси Борис Громов, Мудофаа бўйича Федерация кенгаши қўмитаси собиқ аъзоси Франц Клинцевич ҳамда Байналминал жангчилар қўмитаси раиси Алексей Ковалёвлар иштирок этади.
Шунингдек, 1 февраль куни, ўз аскарлик бурчини адо этаётиб ҳалок бўлган 1515 нафар инсон исмлари Мустақиллик майдонидаги мотамсаро она мемориалига киритилади. Бундан ташқари, Ўзбекистон мустақиллиги ва конституцион тузумини ҳимоя қилаётиб жон фидо қилган офицерлар фамилиялари ҳам рўйхатдан жой олади.
Худди шу куни «Туркистон» саройида байрам концерти ташкил этилади ва бу тадбирга республиканинг барча вилоятларидаги уруш фахрийлари таклиф этилади. Тадбир Ўзбекистон ҳукумати, Мудофаа вазирлиги, «Ёшлар иттифоқи» ва жамоатчилик ташкилотлари кўмагида ташкил этилган.
Расмий маълумотларга кўра, 1979 йилдан 1989 йилга қадар Афғонистонда бўлиб ўтган ҳарбий ҳаракатларда 65 минг нафарга яқин ўзбекистонликлар иштирок этган. Улардан бир ярим мингга яқини ҳалок бўлган, 2,5 мингга яқини эса жароҳат олиб, бир умрга ногирон бўлиб қолган.
Изоҳ (0)