Наманганда ижтимоий мослашув марказлари фаолиятига бағишланган брифинг бўлиб ўтди. Бу ҳақда «Дарё» мухбири хабар бермоқда.
Вилоят ҳокимлиги ахборот хизмати томонидан ташкил этилган тадбирда вилоят ҳокимининг ўринбосари, вилоят хотин-қизлар қўмитаси раиси Иродахон Қўчқорова амалга оширилаётган ишлар юзасидан ҳисобот берди.
Давлат раҳбари қарори асосида вилоятнинг барча туман ва шаҳарларида ташкил этилган ижтимоий мослашув марказлари томонидан оғир ижтимоий вазиятга тушиб қолган шахслар, хусусан, хотин-қизларга руҳий-психологик, маънавий ва тезкор ижтимоий ёрдам кўрсатиб келинмоқда.
Шаҳар ва туманлардаги марказларга ҳозирга қадар хотин-қизлардан жами 2304 та мурожаат келиб тушди. Улардан 385 нафарига тиббий, 202 нафарига психологик, 146 нафарига ҳуқуқий хизмат, 177 нафарига кредит олишда ёрдам кўрсатилди, 683 нафари ишга жойлаштирилди. Ажрашиш ёқасида турган 711 оила яраштирилди.
— Наманган шаҳридаги ижтимоий мослашув марказига ўтган йил охиригача 500 дан ошиқ мурожаат бўлди, улардан аксарияти оилавий келишмовчиликлар, ажримлар масаласида, — дейди марказ директори Назира Раҳимжонова. —Оғир ижтимоий вазиятга тушиб қолган аёлларга қўлдан келганча кўмак бериб келяпмиз. Жумладан, асли наманганлик, Қирғизистонга турмушга чиқиб, эрининг вафотидан сўнг ватанига қайтиб келган 68 яшар Замира ая Абдулҳамидова 20 кун давомида марказимизда яшади. У кишини қариялар уйига жойлаштириш тадоригини кўраётганимизда шаҳарнинг Исломобод маҳалласида истиқомат қилувчи аёл келиб, ўзи билан олиб кетди. «Янги қурилиш» маҳалласида яшовчи, 1992 йилда туғилган Н.Б оилавий муаммолар туфайли 3 ойдан бери 3 нафар қизи билан марказимизда яшаб келмоқда. Энди уни суд тартибида уйига киритишга тайёргарлик кўряпмиз. Шу каби муаммолар кўплаб юзага келаётгани боис ижтимоий мослашув марказларини молиялаштиришни йўлга қўйиш, штат бирликлари ажратиш, шифокорлар, психологлар, юристларни жалб этиш зарурати туғилмоқда.
Изоҳ (0)