Депутат Қозоғистоннинг номини ўзгартиришни таклиф қилди

Қозоғистонлик депутат Азат Перуашев мамлакат номини ўзгартиришни таклиф қилди, дея хабар беради «Tengrinews».

Бу ҳақдаги депутат сўровини у Қозоғистон бош вазирига йўллаган. Перуашев 2020 йилда Қозоғистон Республикаси 100 ёшини нишонлашини эслатган. «Ак жол» демократик партияси Қозоғистон Республикасининг 100 йиллигига давлат даражасида эътибор қаратишни ва ушбу санани муносиб нишонлашни таклиф қилган.

«Мамлакатга расмий Қозоқ Республикаси номини қайтариш таклифини кўриб чиқишингизни сўраймиз» — дейилади сўровда.

Бундай ташаббусни Нурсултон Назарбоев беш йил олдин таклиф қилганди.

Ҳамма нарсани ўз номи билан аташ лозим, қорани- қора, оқни- оқ, қозоқни-қозоқ.

Республикага ҳатто тоталитар ҳокимият ҳам тан олган асл номни қайтариш нафақат тарихий адолатни тиклаш, балки барча миллатдошларимизнинг ҳамжиҳатлиги ва дўстлигига катта туртки беради», — дейди депутат Азат Перуашев.

2014 йилнинг февраль ойида Нурсултон Назарбоев республиканинг расмий номи ҳақида фикр билдириб шундай деган эди: «Эҳтимол вақти келганда мамлакатни «Қозоқ эли» деб аташ масаласини кўриб чиқиш лозим, аммо даставвал буни халқ билан муҳокама қилиш лозим».