Ўзбекистонда тўлов тизимлари тўғрисидаги қонун лойиҳасининг асосий камчиликлари маълум қилинди

10 январь куни Марказий банк, Ўзмиллийбанк ва UPAY, Uzcard, PayMe, Click, Mbank вакиллари иштирокида «Тўловлар ва тўлов тизимлари тўғрисида»ги қонун лойиҳаси муҳокама қилинди. Бу ҳақда Spot хабар бермоқда, деб ёзади Repost.

Унда тўлов тизимларининг фаолияти, тўловларни амалга ошириш ва назорат қилиш соҳасидаги муносабатларни тартибга солиш муҳокама қилинди.

МБ консультанти Шуҳрат Қурбоновнинг фикрича, янги қонун тўлов тизимларини легаллаштириш имконини беради ва уларга кўпроқ имконият ва ҳуқуқлар тақдим этади.

Ҳужжат доирасида бозор иштирокчилари тўлов ташкилоти ёки агенти сифатида ваколатли тизимни танлаш ҳуқуқига эга. Танланган компания банкка боғлиқ ҳолда ишлайди ва ўзининг шахсий бренди остида ишлай олмайди.

Ҳужжатнинг ҳозирги таҳрири банкдан мустақил бўлишни истовчи компанияларга лицензия олиш мажбуриятини юклайди. Лицензия олиш бир ой давомида кўриб чиқилади. Бунда лицензия олиш компания ишини ортга суриши мумкин.

Қонун лойиҳасини яратувчилар фикрича, лицензия олиш бўйича барча талабларни бажариш мумкин. Бу келажакда фирибгарларга қаршилик кўрсатиш имконини беради. МБ вакилларининг таъкидлашича, тўлов ташкилотлари халқнинг пуллари билан ишлайди, шу сабабдан фойдаланувчиларни хавфсизлантириш учун лицензия зарур.

Таъкидлаш жоизки, МБ томонидан ишлаб чиқилаётган Ҳумо тўлов тизими маълум бир саволларни келтириб чиқарди. Бозор иштирокчилари Марказий банк бошқа тизимлар билан рақобатлашишидан ташвишланмоқда.