Ўзбекистон Республикаси Адлия вазири Русланбек Давлетов Жанубий Корея Адлия вазири Пак Санг Ги билан учрашди. Бу ҳақда вазирликнинг Жамоатчилик билан алоқалар бўлими хабар берди.
Жанубий Корея делегацияси Ўзбекистон Республикаси Адлия вазирлигининг адлия соҳасидаги кенг кўламли ислоҳотлар жараёнида фаолияти билан танишиш, тажриба алмашиш мақсадида ташриф буюрди.
Адлия вазири бошчилигидаги Ўзбекистон делегацияси ўтган йилнинг 26—30 ноябрь кунлари Жанубий Кореяга ишчи ташрифи доирасида Жанубий Корея Адлия вазирлигидаги учрашуви доирасида ҳамкасбларига Ўзбекистонга ташриф буюришни таклиф қилган.
Томонлар ҳамкорликни янада ривожлантириш, хусусан, коррупцияга қарши кураш, қонун ҳужжатларни ишлаб чиқиш ва экспертиза қилиш, кадрлар тайёрлаш ва малакасини ошириш, хусусан, хорижий инвестицияларни жалб этиш ва инвестиция иқлимини яхшилаш, юридик хизматлар сифати ва тезкорлигини ошириш соҳасидаги масалаларни муҳокама қилди.
2017 йилнинг 23 ноябрдаги икки мамлакат Адлия вазирликлари ўртасида имзоланган ҳамкорлик тўғрисидаги меморандумга мувофиқ қўшма лойиҳаларни амалга ошириш бўйича «Йўл харитаси»ни ишлаб чиқиш муҳимлиги таъкидланди. Бу эса Ўзбекистонда очилган Жанубий Кореянинг етакчи юридик компаниялари ваколатхоналари инвесторлар ҳуқуқини ҳар томонлама ҳимоя қилиш, шартнома-ҳуқуқий база сифатини оширишга имкон беради.
Ўзбекистон Адлия вазири жанубий кореялик ҳамкасбларини мамлакатда Ҳаракатлар стратегияси доирасида, хусусан, қонун устуворлигини таъминлаш ва суд-ҳуқуқ тизимини ислоҳ қилиш соҳасида амалга оширилаётган кенг кўламли ўзгаришлар тўғрисида хабардор қилди. Бу йўналиш фуқаролар, тадбиркорлар, хусусан, хорижий инвесторларнинг ҳуқуқ ва эркинликларини ишончли ҳимоя қилиш кафолатларини мустаҳкамлаш, жиноятчиликка қарши кураш ва ҳуқуқбузарликларнинг, айниқса давлат ҳокимиятининг барча даражасидаги коррупциянинг олдини олиш бўйича чора-тадбирларнинг самарасини ошириш, шунингдек, юридик ёрдам ва ҳуқуқий хизмат кўрсатиш тизимини такомиллаштиришга йўналтирилганлиги таъкидланди.
Жанубий Корея делегацияси инсон ҳуқуқлари ва қонуний манфаатларини ҳимоя қилиш, қонунчиликни ишлаб чиқиш соҳасида Ўзбекистон билан ўзаро ҳамкорлигини кенгайтиришдан манфаатдорлигини билдирди.
Очиқ ва конструктив мулоқот доирасида Жанубий Корея Адлия вазири Пак Санг Ги Ўзбекистон адлия органлари ва муассасалари фаолиятидаги ижобий ўзгаришларни юқори баҳолади ва уларни халққа яқинлашиш, фаолиятининг очиқлиги ва шаффофлигини таъминлашга имкон беришини айтиб ўтди.
Маълумот учун, Жанубий Корея Адлия вазирлиги адлия вазири бошчилигида адлия ишларини назорат қилувчи, Вазирлар Маҳкамаси даражасидаги вазирликдир. У суд таъқиби, ҳукмларни чиқариш, иммиграция назорати ва инсон ҳуқуқларини ҳимоя қилишга жавоб беради.
Изоҳ (0)