Мудофаа вазирлиги тизимида ижтимоий таъминот ва тиббиёт йўналишида бир қанча ислоҳотлар амалга оширилмоқда. ЎзА мухбири Мудофаа вазирлиги Тиббий таъминот бошқармаси бошлиғи Носиржон Фозиловга макур мавзудаги саволлар билан мурожаат қилди.
— Мудофаа вазирлигида тиббий таъминот яхшиланиши борасида нималарга аҳамият қаратилмоқда?—Биз замон шиддатини, инсон тафаккурини ва бугунги техника тараққиётини инобатга олган ҳолда кўплаб режаларни қўйганмиз. Ҳарбий хизматчиларга тиббий ёрдамни яхшилаш мақсадида юқори билим кўникмага эга, салоҳиятли кадрлар тайёрлашга аҳамият қаратмоқдамиз. Бугун ҳаммамиз аминмиз, тараққиёт ривожига гўзал бино, замонавий техника ва тўкис жиҳозланган масканларнинг ўзи кифоя эмас. Энди бизга юксак салоҳиятли кишилар, тиббиётни чуқур биладиган, талабчан ва зукко ёшлар керак. Чунки ҳар қандай қулай шароит яратилган бўлса-да, у ерда малакали ёшлар, кўникмага эга бўлган кадрлар ишламаса, бу бунёдкорликлар фойда учун эмас, кўпроқ зарарга хизмат қилади. Шуларни кўзда тутган ҳолда жаҳоннинг нуфузли олий ўқув юртлари билан шартномалар имзоладик. Шу жумладан, Россия Федерациясининг Тиббиёт академияси билан шартнома туздик. Ҳужжатга кўра ёшларимиз у ерда турли тиббиёт йўналишлари бўйича икки йиллик олий таҳсилни олиб қайтишади. Бундан ташқари, тор доира мутахассислик курслари, уч ойдан ошиқ малака ошириш амалиётлари йўлга қўйилган. 2019 йилдан бошлаб бу ҳамкорлик тизимли йўлга қўйилади.Бундан ташқари, кадрларимизнинг тил ўрганишига ҳам эътибор қаратяпмиз. Шу жумладан, 2018 йил мобайнида 25 та ҳарбий шифокорларга тил ўргатдик. Улардан 20 таси инглиз, 5 таси немис тили бўйича кўникмасини оширди. Ҳозирда мана шу ёш кадрларимиздан иккитаси АҚШнинг Техас штатида малака оширмоқда.— Бугун тиббиёт бинолари замон талабларига қай даражада жавоб беради?.. Оддий аҳоли учун ҳам фойдаланиш тартиблари йўлга қўйилганми?— Президент ташаббуси билан Мудофаа вазирлигининг Марказий ҳарбий клиникасида улкан бунёдкорлик ишлари бошлаб юборилган. Замонавий тиббий асбоб-ускуналар билан жиҳозланган 280 ўринли жарроҳлик бўлими фойдаланишга топшириш арафасида. Самарқанд, Қарши ҳарбий госпиталларини қайтадан қуриш ва замон талабига мос жиҳозлаш кўзда тутилган. Яқиндаги Вазирлар Маҳкамасининг қарорига мувофиқ, энди оддий аҳоли ҳам замонавий ва қулай ҳарбий клиникалардан фойдаланиши мумкин. Пуллик тизим бўлса-да, арзон ва қулай бўлган тиббий муолажаларни олади.— Яқинда ижтимоий тармоқларда махсус ҳарбий кўриклар босқичи икки баробарга қисқариши турли баҳсларга сабаб бўлди. Сизнинг-ча, бунда нималар аҳамиятга олинди?— Албатта, ислоҳот – ислоҳот учун эмас, у аввало, инсон манфаати учун қилинади. Бу ислоҳот замирида ҳам энди ҳарбий соҳада ўз келажагини боғлаш умидида бўлган ёшларимиз аввалгидек ортиқча сарсонгарчиликка учрамайди. Вақтларини йўқотиб республика тиббиёт марказларига келмайди. Ўзларига яқин марказий тиббиёт шифохоналарига бориб махсус кўрикдан ўтади. Қоғозбозликлар, оворагарчиликларга чек қўйилади. Ҳақиқатдан ҳам бу тизимда анча ўзгаришлар бўлади. Энди ҳарбий хизматга ёки ҳарбий соҳада таълим олишни хоҳлаганлар учун махсус тиббий кўриклар икки баробар қисқаради.— Ҳамкасбларингизга байрам табрикларингиз!— Бу байрам нафақат ҳарбийларнинг, балки Ватанимизни турли нотўғри фикрлардан, ёт ғоялардан асраб келаётган ёзувчи-шоирларимиз, бозорларимизни ризқ-рўзга тўлдириб келаётган бободеҳқонларимиз, бизнинг келажагимиз бўлмиш болаларимизни Ватанни севишга ўргатиб келаётган, уларга илм беришда чарчамаётган ўқитувчиларнинг ҳам байрамидир. Шу муносабат билан Ўзбекистон Республикаси Қуролли Кучлари ташкил этилганининг 27 йиллиги ҳамда Ватан ҳимоячилари куни муносабати билан фидокор, бағрикенг, меҳмондўст ва меҳрибон халқимизни чин юракдан табриклайман!
Изоҳ (0)