Mudofaa vazirligi tizimida ijtimoiy ta’minot va tibbiyot yo‘nalishida bir qancha islohotlar amalga oshirilmoqda. O‘zA muxbiri Mudofaa vazirligi Tibbiy ta’minot boshqarmasi boshlig‘i Nosirjon Fozilovga makur mavzudagi savollar bilan murojaat qildi.
— Mudofaa vazirligida tibbiy ta’minot yaxshilanishi borasida nimalarga ahamiyat qaratilmoqda?—Biz zamon shiddatini, inson tafakkurini va bugungi texnika taraqqiyotini inobatga olgan holda ko‘plab rejalarni qo‘yganmiz. Harbiy xizmatchilarga tibbiy yordamni yaxshilash maqsadida yuqori bilim ko‘nikmaga ega, salohiyatli kadrlar tayyorlashga ahamiyat qaratmoqdamiz. Bugun hammamiz aminmiz, taraqqiyot rivojiga go‘zal bino, zamonaviy texnika va to‘kis jihozlangan maskanlarning o‘zi kifoya emas. Endi bizga yuksak salohiyatli kishilar, tibbiyotni chuqur biladigan, talabchan va zukko yoshlar kerak. Chunki har qanday qulay sharoit yaratilgan bo‘lsa-da, u yerda malakali yoshlar, ko‘nikmaga ega bo‘lgan kadrlar ishlamasa, bu bunyodkorliklar foyda uchun emas, ko‘proq zararga xizmat qiladi. Shularni ko‘zda tutgan holda jahonning nufuzli oliy o‘quv yurtlari bilan shartnomalar imzoladik. Shu jumladan, Rossiya Federatsiyasining Tibbiyot akademiyasi bilan shartnoma tuzdik. Hujjatga ko‘ra yoshlarimiz u yerda turli tibbiyot yo‘nalishlari bo‘yicha ikki yillik oliy tahsilni olib qaytishadi. Bundan tashqari, tor doira mutaxassislik kurslari, uch oydan oshiq malaka oshirish amaliyotlari yo‘lga qo‘yilgan. 2019-yildan boshlab bu hamkorlik tizimli yo‘lga qo‘yiladi.Bundan tashqari, kadrlarimizning til o‘rganishiga ham e’tibor qaratyapmiz. Shu jumladan, 2018-yil mobaynida 25 ta harbiy shifokorlarga til o‘rgatdik. Ulardan 20 tasi ingliz, 5 tasi nemis tili bo‘yicha ko‘nikmasini oshirdi. Hozirda mana shu yosh kadrlarimizdan ikkitasi AQShning Texas shtatida malaka oshirmoqda.— Bugun tibbiyot binolari zamon talablariga qay darajada javob beradi?.. Oddiy aholi uchun ham foydalanish tartiblari yo‘lga qo‘yilganmi?— Prezident tashabbusi bilan Mudofaa vazirligining Markaziy harbiy klinikasida ulkan bunyodkorlik ishlari boshlab yuborilgan. Zamonaviy tibbiy asbob-uskunalar bilan jihozlangan 280 o‘rinli jarrohlik bo‘limi foydalanishga topshirish arafasida. Samarqand, Qarshi harbiy gospitallarini qaytadan qurish va zamon talabiga mos jihozlash ko‘zda tutilgan. Yaqindagi Vazirlar Mahkamasining qaroriga muvofiq, endi oddiy aholi ham zamonaviy va qulay harbiy klinikalardan foydalanishi mumkin. Pullik tizim bo‘lsa-da, arzon va qulay bo‘lgan tibbiy muolajalarni oladi.— Yaqinda ijtimoiy tarmoqlarda maxsus harbiy ko‘riklar bosqichi ikki barobarga qisqarishi turli bahslarga sabab bo‘ldi. Sizning-cha, bunda nimalar ahamiyatga olindi?— Albatta, islohot – islohot uchun emas, u avvalo, inson manfaati uchun qilinadi. Bu islohot zamirida ham endi harbiy sohada o‘z kelajagini bog‘lash umidida bo‘lgan yoshlarimiz avvalgidek ortiqcha sarsongarchilikka uchramaydi. Vaqtlarini yo‘qotib respublika tibbiyot markazlariga kelmaydi. O‘zlariga yaqin markaziy tibbiyot shifoxonalariga borib maxsus ko‘rikdan o‘tadi. Qog‘ozbozliklar, ovoragarchiliklarga chek qo‘yiladi. Haqiqatdan ham bu tizimda ancha o‘zgarishlar bo‘ladi. Endi harbiy xizmatga yoki harbiy sohada ta’lim olishni xohlaganlar uchun maxsus tibbiy ko‘riklar ikki barobar qisqaradi.— Hamkasblaringizga bayram tabriklaringiz!— Bu bayram nafaqat harbiylarning, balki Vatanimizni turli noto‘g‘ri fikrlardan, yot g‘oyalardan asrab kelayotgan yozuvchi-shoirlarimiz, bozorlarimizni rizq-ro‘zga to‘ldirib kelayotgan bobodehqonlarimiz, bizning kelajagimiz bo‘lmish bolalarimizni Vatanni sevishga o‘rgatib kelayotgan, ularga ilm berishda charchamayotgan o‘qituvchilarning ham bayramidir. Shu munosabat bilan O‘zbekiston Respublikasi Qurolli Kuchlari tashkil etilganining 27 yilligi hamda Vatan himoyachilari kuni munosabati bilan fidokor, bag‘rikeng, mehmondo‘st va mehribon xalqimizni chin yurakdan tabriklayman!
Izoh (0)