Наманган шаҳридаги Агротадбиркорлик коллежида Республика хотин-кизлар қўмитаси ва Олий суд ўртасида имзоланган меморандумга мувофиқ ўтказилган сайёр қабулда ажралиш арафасида турган 43 та оила яраштирилди. Бу ҳақда «Дарё»га Наманган вилояти ҳокимининг ўринбосари, хотин-қизлар қўмитаси раиси Иродахон Қўчқорова маълум қилди.
Нотинч оилалар вакиллари таклиф этилган мулоқотда Олий суд раиси ўринбосари Холмўмин Ёдгоров, республика хотин-кизлар кумитаси раиси ўринбосари Гулнора Маруфова оилаларни мустаҳкамлаш омиллари тўғрисида ўз-фикр мулоҳазаларини билдирди, мавзуга тааллуқли фильм намойиш этилди.
Шундан сўнг хотин-қизлар қўмиталари, маҳалла фуқаролар йиғинлари мутахассислари, имом-хатиблар ҳар бир оила билан алоҳида суҳбат юритди, ажрим сабабларини ўрганди. Мулоқотлар натижасида 43 та оила муроса йўлини танлади.
— Шу қабул баҳона оиламизни тиклаш учун қадам қўйдик. Қушнинг ҳам ини бузилмасин экан. Бизга тўғри йўл-йўриқ кўрсатилганидан хурсанд бўлдик, йўл қўйган хатоларимиз ётиғи билан тушунтирилди, — дейди Наманган шаҳридаги «Алпомиш» маҳалласида яшовчи Одина Иззатулаева.
Иродахон Қўчқоровага кўра, ўтган йили Наманганда 2508 та ажрим қайд этилди. 2017 йилга нисбатан ажримлар сони бироз, аниқроғи, 16 тага камайган бўлса ҳам, вилоятнинг Косонсой, Норин, Поп ва Чортоқ туманларида бу кўрсаткич ошган. Шунингдек, вилоятда 2911 та шаърий никоҳ билан яшаётган оила аниқланди. Шу кунгача улардан 172 жуфтликнинг никоҳи қонуний расмийлаштирилди.
Изоҳ (0)