13 январь куни Мудофаа вазирлиги ҳамда Жисмоний тарбия ва спорт вазирлиги ҳамкорлигида Ўзбекистон Қуролли Кучлари куч тузилмалари ўртасида «Соғломлаштириш акцияси» ўтказилди. Унда 300 нафарга яқин ҳарбий хизматчи билан бирга профессионал спортчилар ҳам иштирок этди, деб ёзади ЎзА.
Тантанали очилиш маросимида Ўзбекистон Президентининг маслаҳатчиси Абдужаббор Абдувоҳидов, Президент ҳузуридаги Хавфсизлик кенгаши котиби Виктор Маҳмудов, Ёшлар иттифоқи Тошкент шаҳар кенгаши раиси ҳамда давлат ва жамоат ташкилотлари вакиллари сўзга чиқиб, барчани 14 январь — Ватан ҳимоячилари куни билан табриклади.
Иштирокчилар узоқ масофага югуриши олдидан Ватанга қасамёд монументи пойига гулчамбар қўйилди.
Эркаклар ва аёллар ўртасидаги мусобақага Қуролли Кучлар давлат музейи олдида старт берилди. Бу ҳақда Мудофаа вазирлиги матбуот хизмати хабар берди.
Финиш чизиғи Халқлар дўстлиги майдонида бўлиб, икки манзил орасидаги масофа 10 километрдан ошди.
Белгиланган маррага етиб келган иштирокчиларни ҳарбий хизматчилар, курсантлар ҳамда пойтахт аҳолиси ва меҳмонлари тантанали тарзда кутиб олди.
Эркаклар ўртасида маррага биринчи бўлиб, Мудофаа вазирлиги Спорт клуби вакили Шохруҳ Довлатов етиб келган бўлса, аёллар ўртасида биринчиликни Мудофаа вазирлиги спорт клубининг яна бир ёрқин вакили Катя Тунгускова қўлга киритди.
Эркаклар ўртасида:
- 1-ўрин — Шохруҳ Давлатов (Мудофаа вазирлиги Спорт клуби);
- 2-ўрин — Владислав Мамедов (Мудофаа вазирлиги Спорт клуби);
- 3-ўрин — Зикрилло Маматқулов (Ички ишлар вазирлиги).
- 1-ўрин — Катя Тунгускова (Мудофаа вазирлиги Спорт клуби);
- 2-ўрин — Марина Хмелевская (Мудофаа вазирлиги Спорт клуби);
- 3-ўрин — Нурхон Муҳиддинова (Мудофаа вазирлиги Спорт клуби).
Изоҳ (0)