Ўзбекистон Республикаси Вазирлар Маҳкамаси ҳузуридаги «Оила» илмий-амалий тадқиқот маркази ташаббуси билан дастлаб Тошкент вилоятининг Паркент туманида амалга оширилган лойиҳада ФҲДЁга ариза берган 150 нафар никоҳланувчиларнинг ўқув курслари юқори савияда ташкил этилиб, муваффақиятли амалга оширилди ва кўпчиликнинг эътирофига сазовор бўлди. Бу ҳақда ЎзА хабар бермоқда.
«Оила - миллат ифтихори, юрт таянчи, келажак пойдевори» мавзусидаги ўқув курслари ўтган йилнинг август ойида бошланган бўлиб, ўтган беш ой давомида малакали ва тажрибали педагог-мутахассислар томонидан ҳуқуқ, маънавият, иқтисод, репродуктив саломатлик, психология ва дин асослари бўйича билим ва кўникмалар берилди. Сертификатларга эга бўлган тингловчилар ҳаёт сабоқларидан беҳад мамнун бўлди.
Ўзбекистон Республикаси Вазирлар Маҳкамаси ҳузуридаги «Оила» илмий-тадқиқот маркази томонидан 2018 йил 22 ноябрда тасдиқланган «Йўриқнома»га асосан Қорақалпоғистон Республикаси, Тошкент шаҳар ва вилоятларда инновацион мактаблар ташкил этилмоқда.
Вазирлар Маҳкамаси ҳузуридаги «Оила» илмий-амалий тадқиқот марказининг Тошкент вилояти бошқармаси томонидан вилоятнинг ҳар бир туман ва шаҳарларида мазкур мактабларнинг очилиши ҳақиқий байрамга айланди.
Тадбирларда вилоятнинг барча туман ва шаҳар ҳокимлари, ҳамкор ташкилотлардан Хотин-қизлар қўмитаси, туман ФҲДЁ бўлими, «Маҳалла» хайрия жамоат фонди, Республика «Маънавият ва маърифат» маркази туман бўлими, туман тиббиёт бирлашмаси, Халқ таълими туман бўлими, сиёсий партияларнинг туман бўлимлари, туман бош имом-хатиби ва отинойилари ўзларининг маърузаларида оилавий ҳаёт асослари бўйича ўқитишнинг мазмун-моҳияти ҳақида гапириб ўтди.
Изоҳ (0)