9 январнинг эътиборга молик янгиликлари — «Дарё» дайжестида.
Zeromax компаниясининг собиқ ижрочи директори Миродил Жалолов жорий йил 8 январь куни ДХХ тергов изояторидан озод қилинди ва шу куннинг ўзида Тошкентдаги уйига қайтди.
Жиноий ишлар бўйича Тошкент вилоят суди 53 яшар Миродил Жалоловга нисбатан ҳибсга олиш тариқасидаги эҳтиёт чорасини бекор қилди ва у суд залидан қўйиб юборилди. Шундай бўлса ҳам, Жалолов Ўзбекистон Жиноят кодексининг бир неча моддалари билан айбдор деб топилди ва 17 687 040 сўм жаримага тортилди.
***
Хабар берилишича, бу қуролларнинг 85 фоизи ёки 857 миллионтаси оддий аҳолига тегишли, ҳарбийлар қўлида эса 133 миллионта, ҳуқуқни муҳофаза қилувчи идораларда эса 23 миллионта қурол мавжуд.
***
Андижонда пора билан қўлга тушган кадастр ходими ўз бошлиғини тутиб берди.
«Ер тузиш ва кўчмас мулк кадастри» ДК Андижон шаҳар филиали мутахассиси И.С. раҳбари Д.Т. ўзига ноқонуний равишда ўзлаштириб олган Андижон шаҳрининг Кўмакай массивида жойлашган 2 та 4 сотихли ер-участкаларининг ҳар бири учун 10 минг долларидан, жами 20 минг долларини талаб қилган. И.С. воситачи Н.М. орқали олдиндан 10 минг долларини олаётган пайтда ашёвий далиллар билан қўлга тушди.
И.С. олинган пулларни бошлиғи Д.Т.га бериши кераклигини таъкидлади. Унинг пушаймонлик аризаси асосида тадбир давом эттирилди. Андижон шаҳар «Ер тузиш ва кўчмас мулк кадастри» ДК бошлиғи Д.Т. қўл остидаги ходими И.С.дан келишилган ерлардан бирини ажратиш бўйича шаҳар ҳокимининг қарорини чиқариш учун 10 минг доллари олиб, И.С.га 1 минг долларни қайтариб беради. Д.Т. қолган 9 минг долларини олиб кетаётган вақтда ушланди.
***
Президентнинг 2019 йил 7 январдаги қарори билан Тошкент шаҳридаги Амити университети ташкил этилди.
Олий таълим муассасасида ахборот-коммуникация технологиялари соҳасида, биринчи навбатда, дастурий таъминотни ишлаб чиқиш, ахборот тизимлари ва компьютер тармоқларини бошқариш бўйича халқаро стандартлар даражасида юқори малакали мутахассислар тайёрланади.
Университетнинг таълим фаолияти 2019/2020-ўқув йилидан бошланади.
Уни тамомлаган битирувчиларга Ўзбекистон Республикасида олий маълумот тўғрисидаги ҳужжат сифатида эътироф этиладиган Амити университетининг (Ҳиндистон) белгиланган намунадаги дипломи берилади.
***
Санкт-Петербург вилоятининг Зеленогорск шаҳрида 39 ёшли ўзбекистонлик аёл совуқ қотиб ҳалок бўлган.
Маълум қилинишича, қаттиқ совуқ қотган ўзбекистонлик аёлни шаҳар кўчаларининг бирида учратишган. Шифокорлар ёрдамига қарамасдан аёл воқеа жойида вафот этган.
Аёлнинг ўлими билан боғлиқ ҳолат бўйича шаҳар полицияси томонидан тергов-суруштурув ишлари бошлаб юборилгани айтилмоқда.
Изоҳ (0)