Қашқадарё вилояти ҳокимлиги ҳамда Жануби-ғарбий махсус ҳарбий округи қўшинлари қўмондонлиги томонидан Қарши шаҳрида яшовчи 50 нафар имконияти чекланган фуқарога ногиронлик аравачалари ҳамда байрам совғалари топширилди. Бу ҳақда Мудофаа вазирлиги матбуот хизмати «Дарё»га маълум қилди.
Эслатиб ўтамиз, Ўзбекистон Президенти 2017 йилнинг 1 августдаги «Ногиронларни давлат томонидан қўллаб-қувватлаш тизимини янада такомиллаштириш чора-тадбирлари тўғрисида»ги фармойишни имзолаган эди. Мазкур фармойиш юзасидан вилоятлар, туман ва шаҳарларда бир қатор ишлар амалга оширилди.
Байрам тадбирида Қашқадарё вилояти ҳокими Зафар Рўзиев, Мудофаа вазирлиги масъул офицерлари, «Маҳалла» хайрия жамоат фонди вилоят бўлими, Ўзбекистон ёшлар иттифоқи вилоят кенгаши фаоллари, кенг жамоатчилик вакиллари иштирок этди.
Тадбир давомида вилоят ҳокими сўзга чиқиб, мамлакатда кексалар ва ногиронлар, ижтимоий ҳимояга муҳтож фуқароларни ҳар томонлама қўллаб-қувватлаш, уларнинг турмуш шароитини янада яхшилаш, муаммоларини ҳал этиш ва ҳаётдан рози бўлиб яшашига алоҳида эътибор қаратилаётганини таъкидлади.
Изоҳ (0)