Термиз шаҳрида Жануби-ғарбий махсус ҳарбий округининг ҳарбий қисмларида муддатли ҳарбий хизмат бурчини ўтаётган аскарлар ўртасида ўтказилаётган «Темур тузуклари билимдони» танловининг Сурхондарё вилоят босқичи бўлиб ўтди. Бу ҳақда ЎзА хабар бермоқда.
Ўзбекистон Республикаси Қуролли Кучлари ташкил этилганининг 27 йиллиги ҳамда Ватан ҳимоячилари куни муносабати билан ўтказилаётган танловда унинг қуйи босқичида ғолиб бўлган жамоалар ўзаро беллашди.
— Жорий йилда илк марта ўтказилаётган интеллектуал ўйин шаклидаги мазкур танлов буюк саркарда Амир Темурнинг бой маданий меросини ўрганиб, уни оммалаштириш ва ёшларнинг маънавий иммунитетини мустаҳкамлашда муҳим ўрин тутади, — дейди подполковник Б.Мирзаев. — Уларнинг мутолаа маданиятини юксалтириш орқали Ватанимиз тарихи, миллий ва умуминсоний қадриятлар, ижтимоий ҳаёт ҳақидаги билим ва кўникмаларини оширади. Дунёқарашини янада ривожлантириб, жамиятда ўз ўрнини топишга кўмаклашади.
Иштирокчилар учта шарт бўйича ўз билимини намойиш этиб, «Темур тузуклари» асаридан тест синовларини топширди. Иккинчи шарт бўйича буюк саркарданинг мазкур асари бўйича тузилган саволларга жавоб берди. Учинчи шартда ўз тақдимотлари билан Ўзбекистоннинг шонли тарихи, буюк қаҳрамонлар, саркарда ва қўмондонлар ҳаёти ҳамда жасоратини қай даражада билишларини намойиш қилди.
Танлов якунида «Қалқонлар» жамоаси фахрли биринчи ўринни қўлга киритди. Иккинчи ўрин «Қалқон», учинчи ўринни «Амир Темур авлодлари» жамоаларига насиб этди.
Ғолиб жамоалар Жануби-ғарбий махсус ҳарбий округи қўшинлар қўмондонлиги ўртасида бўлиб ўтадиган навбатдаги босқичга йўлланма олди. Диплом ва қимматбаҳо совғалар билан тақдирланди.
Термиз гарнизони ҳарбий оркестри хонандаларининг куй-қўшиқлари тадбирга байрамона руҳ бағишлади.
Изоҳ (0)