16 декабрь, якшанба куни Ла Лига 16-туридан ўрин олган учрашувда «Барселона» 5:0 ҳисобида «Леванте»ни мағлубиятга учратди. Мазкур ўйинда Лионель Месси яна бир бор рекорд ўрнатди, деб хабар беради Ла Лиганинг Twitter’даги расмий саҳифаси.
«Леванте»га қарши ўйиндаги муваффақият Лионель Месси учун Ла Лига доирасидаги 323-ғалабаси ҳисобланади. Испания чемпионатидаги ғалабалар сонига кўра, аргентиналик футболчи клуб собиқ рекордчиси Хавини (322) ортда қолдирди.
Эслатиб ўтамиз, 38 ёшли Хави «Барселона» таркибида 1998 йилдан 2015 йилга қадар ўйнаган. Ҳозирда у фаолиятини Қатарнинг «Ас-Саад» жамоасида давом эттирмоқда.
31 ёшли Месси 2004 йил 16 октябрь куни «Эспаньол» билан бўлган баҳсда дебют ўйинини ўтказган ва ўшанда илк ғалабасини қўлга киритган. Месси «Барса» тарихидаги энг яхши тўпурар бўлиб, унинг ҳисобида 572 та гол мавжуд. Мессининг энг яқин таъқибчиси Сезар Родригес — 232 та гол муаллифи.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)