Наманган шаҳридаги марказий кўчаларга махсус чиқинди контейнерлари ўрнатилмоқда. Бу ҳақда «Дарё»га «Тоза ҳудуд» ДУК шаҳар филиали бошлиғи Дилшод Воҳисов маълум қилди.
—Намангандаги мингга яқин корхона-ташкилот ва муассаса, 42 та маҳаллага хизмат кўрсатамиз. Шаҳарнинг санитария ҳолатини яхшилаш учун «Kamel-aymon» МЧЖ томонидан ишлаб чиқарилаётган 15 та махсус чиқинди контейнери харид қилинди. Улар Бобур, Қўқон, Уйчи каби марказий ва чиқинди кўп тўкиладиган кўчаларга жойлаштирилиши режалаштирилган, — дейди филиал бошлиғи Дилшод Воҳисов.
Шунингдек, бекат кўринишида ишланиб, усти ёпилган, пластмасса, қоғоз, шиша чиқиндилари алоҳида ташланадиган 10 та замонавий чиқиндихона ҳам шаҳарнинг гавжум жойларига ўрнатилмоқда.
Маълумот учун, «Тоза ҳудуд» Наманган шаҳар филиали томонидан бир кеча-кундузда ҳудуддан 250 тоннагача чиқинди олиб кетилмоқда.
Изоҳ (0)