АҚШнинг Миллий аэронавтика ва коинотни тадқиқ этиш бошқармаси (NASA) Марс сайёрасида «Инсайт» сайёралараро станцияси ёрдамида ёзиб олинган шамол тебранишлари товушини эълон қилди. Бу ҳақда «Meduza» хабар берди.
Ёзувлар 1 декабрь куни «Инсайт» ускунаси турган жойда шимоли-ғарбдан соатига 16—24 километрлик кучли шамол эсган пайтда қайд этилган.
Айни пайтда аппарат сейсмографи сайёра юзасида шамол пайтида ўзига ўрнатилган қуёш панелларининг титрашини ёзиб олгани маълум қилиняпти. « ‘Инсайт’ худди улкан қулоқ каби ишлаяпти.У худди Марс шамоли ўзининг қулоқларига ураётганини тинглаётгандек», — дейди ускуна билан ишлаётган олимлардан бири.
Мазкур овозни икки хил вазиятда — асл (ўта паст частотада, қулоқчин орқали) ва тинглаш қулай бўлиши учун икки октава баландлатилган тарзда эшитиш мумкин.
Шамол тебранишларининг яна бир вазиятини ҳаво босимини ўлчаш асбоби ёзиб олган бўлиб, частотаси ўта паст бўлгани боис бу товушни инсон қулоғи мутлақо илғамайди. Шу боис оддий одам уни эшита олиши учун ёзувни юз марта тезлаштиришга тўғри келган.
Изоҳ (0)