Нью-Йоркдаги CNN офисида бомба ҳақидаги хабардан сўнг тўлиқ эвакуация ўтказилди

Нью-Йорк полицияси бино миналаштирилгани ҳақидаги қўнғироқдан сўнг CNN офисини тўлиқ эвакуация қилди. Бу ҳақда Forum Daily маълум қилди.

Ҳуқуқ-тартибот вакилларига кўра, телеканалга қўнғироқ қилган эркак CNN офиси жойлашган Time Warner биносининг турли жойларига 5 та бомба қўйилганини маълум қилган.

Телеканал хавфсизлик хизмати ходимлари эҳтиёт чораси сифатида эвакуацияни амалга оширган ва полицияни чақирган. Полиция ҳам бинода тинтув ўтказган, бироқ ҳеч қандай шубҳали буюмлар топилмаган.

Бино миналаштирилгани ҳақидаги қўнғироқ Дональд Трамп Twitter’даги саҳифасида навбатдаги равишда «ёлғон хабарлар таҳдиди» ҳақида ёзув қолдирганидан бир соат ўтиб-ўтмай янграгани билдирилмоқда. АҚШ президенти буни кўпинча CNN билан боғлиқ ҳолда келтиради.