Футбол бўйича «Бухоро» клуби Улуғбек Бақоев ўрнига Шуҳрат Файзиев бош мураббий этиб тайинлангани ҳақида эълон қилди. Бу ҳақда клуб матбуот хизмати хабар берди.
Ўзбекистон Профессионал футбол лигаси хабарига кўра, Шуҳрат Файзиевда «Про» лицензияси йўқ. У фақат «А» лицензиясига эга. 2019 йилдан Суперлига клублари бош мураббийлари «Про» лицензиясига эга бўлиши шарт. Мазкур лицензияга эга бўлмаган мураббийлар Суперлига ўйинлари учун рўйхатдан ўтказилмайди. Яъни, Файзиев ҳам Суперлигада клуб бош мураббийи сифатида фаолият олиб бора олмайди.
Таъкидланишича, Суперлигада фаолиятини давом эттириш истагида бўлган мутахассислар айни кунларда Тошкентда бўлиб турибди ва улар «Про» лицензияси учун курсларда иштирок этяпти. Хусусан, «Бухоро» футбол клубининг эндиликдаги собиқ бош мураббийи Улуғбек Бақоев ҳам улар орасида бор. Бироқ Шуҳрат Файзиев ўз малакасини ошириш имконини берувчи мазкур курсда ўқиш истагини билдирмаган.
Шунингдек, ПФЛ «Бухоро»ни ўз зиммасидаги қарздорликлар масаласини ижобий ҳал қилмагунига қадар, янги мураббий ва футболчилар рўйхатдан ўтказилмаслиги ҳақида огоҳлантирган.
Изоҳ (0)