Наманганда Зулфия номидаги давлат мукофоти танловининг вилоят босқичида 134 нафар номзод республика босқичига ўтиш учун беллашди. Бу ҳақда «Дарё»га вилоят ҳокимининг ўринбосари, вилоят хотин-қизлар қўмитаси раиси Иродахон Қўчқорова маълум қилди.
— Танловнинг бошланғич босқичларида 1193 нафар қизимиз қатнашди. Улардан энг муносиблари сараланиб, вилоят босқичига 134 нафар номзод таклиф этилди. Бу йил фан, таълим, маданият, адабиёт ва санъат йўналишлари қаторига спорт алоҳида йўналиш сифатида, жамоатчилик эса янги йўналиш бўлиб қўшилди, — дейди Иродахон Қўчқорова.
Вилоятдан шу кунгача 20 нафар қиз Зулфия номидаги давлат мукофоти соҳиби бўлган. Улар орасида шоира Гулчеҳра Зокирова (Беназир) ҳам бор.
—2003 йили адабиёт йўналишида шу мукофотга сазовор бўлгандим. Ўтган йиллар давомида учта шеърий китобим чоп этилди, яна бир янгиси нашрга тайёрланмоқда. Бу йилги вилоят босқичида ўзим танлов комиссияси сафида қизларимизнинг ишларини баҳолаяпман, — дейди «Наманган» нашриёти бош муҳаррири Г.Зокирова.
Вилоят босқичида иштирок этиш учун Янгиқўрғон туманидан келган 17 ёшли Маржона Абдуллажонованинг айтишича, кулолчилик қизлар орасида кўп ҳам оммалашмагани унга бироз бўлса ҳам далда берди.
—10 ёшимдан бери кулолчилик билан шуғулланиб келаман. Вилоят босқичида ҳакамларга ҳавола этиш учун ўзим ясаган товоқ, лаган, кўза ва керамик ҳайкалчаларимни олиб келдим. «Санъат» йўналишида иштирок этяпман, республика босқичига ҳам йўл оламан, деган умидим бор, — дейди Маржона.
Маълумот учун, Зулфия номидаги давлат мукофотига номзодлар танловининг вилоят босқичида қатнашганларнинг энг кўпи «Санъат» (29 нафар иштирокчи), «Спорт» (23) ва «Адабиёт» (20) йўналишларида ўз истеъдодини намойиш этди.
Изоҳ (0)