Тақиқланган клипи «RU.ТV» назарига тушган Шаҳло Аҳмедова, «PROlogue — 2018» ғолиблари, самарқандлик шифокорларнинг қасам ичиши сабаби ва куннинг бошқа муҳим хабарлари

Шаҳло Аҳмедованинг Ўзбекистонда намойиши тақиқланган «Летние дожди» клипи Россиянинг «RU.ТV» телеканали томонидан қўллаб-қувватланмоқда. Телеканалнинг расмий сайтида «Кел, синаб кўрамиз» рукни бўлиб, унда барча хоҳловчиларга мамлакатнинг ёш хонандаларини қўллаб-қувватлашга чорланади. Шаҳло Аҳмедованинг клипи ҳам мана шу рукнга жойлаштирилди.

Алишер Навоий номидаги Ўзбекистон давлат академик катта театрида тўрт кун давом этган «PROlogue — 2018» халқаро кино фестивали ғолиб ва совриндорларини тақдирлаш ҳамда тантанали ёпилиш маросими бўлиб ўтди. Тадбирнинг иккинчи қисмида фестиваль ғолиб ва совриндорларини тақдирлаш маросими бўлиб ўтди. Ўтган йилги фестивалда фаол қатнашган актриса Дилноза Кубаева эса «PROlogue — 2018»да иштирок этмагани сабабларини «Дарё»га маълум қилди.

***

Самарқанд вилоятида шифокорлар томонидан ўтказилган қасам қабул қилиш маросимидан сўнг, Самарқанд вилояти ҳокимлиги мазкур ҳолатни тўхтатиш бўйича топшириқ берди. Маълум бўлишича, шифокорларнинг қасамёд матни тиббиёт бирлашмалари ходимлари томонидан ёзилган. «…Ҳеч ким қасам ичишни талаб қилмаган. Баъзи шифокорлар ушбу тадбирни оммавий қилиб юборишди. Биз дарҳол буни тўхтатдик», – деди «Газета.uz» манбаси.

***

Фарғона вилоятининг Бувайда туманидаги 3-умумий ўрта таълим мактаби ўқитувчиси ўқувчиларни ҳақоратлагани, камситгани ва калтаклагани учун эгаллаб турган лавозимидан озод этилди. Халқ таълими вазирлигининг Ҳуқуқий-назорат хизмати чоп этилган материаллар юзасидан текширув ўтказди. Текшириш натижасида 2018 йилнинг 16 ноябрь куни мактабнинг 7-В синф раҳбари Р. М. шу синфда маънавият соати ўтиш жараёнида икки ўқувчига нисбатан ноқонуний хатти-ҳаракатлар содир этгани, яъни обунага пул бермаганликлари учун синф ўқувчилари олдида ҳақоратлаб, камситгани ва калтаклаганлиги аниқланди.

***

3 декабрь, душанба оқшомида France Football нашри томонидан таъсис этилган «Олтин тўп» соврини ўзининг янги эгасига топширилади. Бугун, шунингдек, «Олтин тўп»дан ташқари яна икки соврин топширилади. Улардан бири аёлларга бериладиган «Олтин тўп», иккинчиси 21 ёшгача бўлган футболчиларга топшириладиган «Копа» соврини.