АҚШда 78 ёшли маҳкум 90 кишини ўлдирганлигига иқрор бўлди

Умрбод қамоқ жазосини ўтаётган 78 ёшли америкалик 90 кишини ўлдирганини тан олди, деб ёзади «НТВ». Сэмюэл Литтл уч аёлнинг қотиллигида айбланиб, судланган эди, аммо энди эркак унинг қурбонлари сони аслида юзга яқин эканлигини маълум қилди.

Америкалик ўз жиноятларини батафсил эслайди ва айнан кимни қаерда ўлдирганлигини икир-чикиригача айтиб бера олади. Тасдиқланмаган маълумотларга кўра, бутун мамлакат бўйлаб 35 ёшдан катта 90 киши унинг қурбонларига айланган. 34 та қотилликни Федерал қидирув бюроси тасдиқлашга улгурди.

Одатда, бокс билан шуғулланган қотил, ўз қурбонларини нокаутга туширган, шундан сўнг бўғиб ўлдирган. Эркак асосан маргинал (аутсайдер) гуруҳлар вакилаларини — фоҳишалар ва гиёҳванд аёлларни ўлдирган.

Агар Литтлнинг кўрсатмалари ўз тасдиғини топса, у Америка тарихидаги энг қонхўр серияли қотилга айланади.