«Ёшлар — келажагимиз» жамғармаси Фарғона тумани филиали ташаббуси билан Жанубий Кореянинг Dae Young Medical тиббиёт компанияси инвестицияси ҳисобидан тиббиётда фойдаланиладиган ўрик ва шафтоли данакларини қайта ишлаш корхонаси ташкил этилади. Бу ҳақда ЎзА хабар берди.
Ушбу компаниянинг Фарғона туманидаги фаолияти бўйича туман ҳокимилиги мутасаддилари Dae Young Medical тиббиёт компанияси раҳбари Ли Юн Ку билан музокара ўтказди. Музокара давомида сўнги йилларда Ўзбекистонда хорижий инвесторлар учун қулай тадбиркорлик муҳити яратиб берилаётганлиги, қишлоқ хўжалигида етиштирилаётган маҳсулотларнинг ўзи ҳам шифобахш хусусиятга эга эканлиги, тиббиёт корхонасининг фаолияти учун Фарғона тумани жуда қулай жой экани инвестор томонидан алоҳида таъкидланди.
Корхона томонидан икки босқичда фаолият ташкил этилади. Биринчи босқичда данак ва мағизларни қайта ишлаш фаолияти бўлиб, бу босқичда қарийб икки миллиард сўм инвестиция жалб этилади ҳамда 50 та иш ўрни яратилади. Иккинчи босқич шарбат ва мурабболар ишлаб чиқариш ҳамда данак пўчоқларини қайта ишлаш жараёни бўлиб, ушбу босқичга ҳам икки миллиард сўм жалб этилади ва яна қўшимча 50 та янги иш ўрни яратилади. Шунингдек, 2019 йилнинг ўзида 10 минг тонна данакни қайта ишлаш режалаштирилган.
Музокаралар давомида туман ҳокими Илҳомжон Носиров томонидан ушбу корхона фаолияти учун зарур бўладиган барча шарт-шароитларни яратиб беришга, тадбиркорлик фаолиятини жадал ривожлантиришда кўмаклашишга тайёр эканликлари, бу учун барча имконият мавжуд эканлиги таъкидланди.
Шу куннинг ўзида тумандаги мутасадди раҳбарлар иштирокида корхона фаолияти учун жойлар ўрганилиб, Оқбилол ҳудудидан 3 гектар ер ажратилишига келишиб олинди.
Изоҳ (0)