Тошкентда ЮНИСEФ томонидан Бутунжаҳон болалар кунига атаб ташкил қилинган «Ташаббус болалар қўлида» акцияси доирасида мактаб ўқувчилари, шу жумладан, Даун синдромли болалар, ОИТВ билан яшовчи болаларни қўллаб-қувватлаш гуруҳи кўнгиллилари ва уларнинг ота-оналари Япониянинг Ўзбекистондаги Фавқулодда ва Мухтор элчиси Нобуаки Ито билан учрашди. Бу ҳақда Ўзбекистондаги ЮНИСEФ ваколатхонаси «Дарё»га маълум қилди.
Учрашувда барча даражалардаги таълим сифати, атроф-муҳит ҳимояси, шу жумладан, Орол денгизини қутқариш чоралари, шунингдек, ўқув муассасаларида зўравонликнинг олдини олиш масалалари муҳокама қилинди.
«Ҳар бир бола ва ёш қандайдир туғма истеъдод соҳиби. Энг асосийси — ўзи табиатан қизиқадиган нарсани топиб, ўз истеъдодини ривожлантириш», — деди Нобуаки Ито учрашувнинг ёш иштирокчиларига мурожаат қилар экан.
«Бизга жаноб Ито билан мулоқот жуда ёқди. Биз ўзимизни қизиқтирган барча саволларга жавоб олдик. Бундай учрашувлар тез-тез бўлиб туришига ҳамда болалар ва ёшларнинг овози доим диққат марказида бўлишига умид қиламиз», — деди учрашув иштирокчиларидан бири.
Бола ҳуқуқлари тўғрисидаги конвенция қабул қилинган кунга бағишланган Бутунжаҳон болалар кунида глобал ташаббусни қўллаб-қувватлаш учун ЮНИСEФ бир нечта элчихоналар ва бошқа ташкилотлар билан ҳамкорликда Тошкентда «Ташаббус болалар қўлида» акциясини ўтказмоқда.
Бола ҳуқуқлари тўғрисидаги конвенция 1989 йил 20 ноябрь куни БМТ Бош Ассамблеяси томонидан қабул қилинган.
193 та мамлакат, шу жумладан, Ўзбекистон томонидан ратификация қилинган конвенцияда 18 ёшгача бўлган ҳар бир инсон жинси, келиб чиқиши, дини ва соғлиғидаги чекловларга қарамай алоҳида ғамхўрлик ва ҳимояга муҳтожлиги айтилган.
Изоҳ (0)