Тошкентда ЮНИСEФ томонидан Бутунжаҳон болалар кунига атаб ташкил қилинган «Ташаббус болалар қўлида» акцияси бўлиб ўтмоқда. Бу ҳақда Ўзбекистондаги ЮНИСEФ ваколатхонаси «Дарё»га маълум қилди.
Мактаб ўқувчилари, шу жумладан, Даун синдромли болалар, ОИТВ билан яшовчи болаларни қўллаб-қувватлаш гуруҳи кўнгиллилари ва уларнинг ота-оналари Ўзбекистондаги Швейцария элчихонасига ташриф буюриб, у ерда Швейцария элчиси Оливье Шав билан учрашди.
«Биз бизни тинглашлари учун элчихонага кетяпмиз. Ишончим комилки, жамиятимиз ногиронлиги бор шахсларни қабул қилишга тайёр бўлиши керак, — деди болалардан бирининг онаси. — Ногиронлиги бор болаларни қўллаб-қувватлаш масалалари доимий равишда муҳокама қилинишига қарамай, жамиятда ҳамон уларга нисбатан стигматизация ва душманларча муносабат мавжуд».
ОИТВ билан яшовчи болаларни қўллаб-қувватлаш гуруҳи кўнгиллилари элчига мактаб ўқувчилари ва уларнинг ота-оналари орасида ОИТВ ҳақида хабардорликни ошириш бўйича олиб бораётган ишлари ҳақида гапириб берди. Улар бундай болаларга ҳар томонлама кўмак кўрсатиш муҳимлигини қайд этди.
Бола ҳуқуқлари тўғрисидаги конвенция қабул қилинган кунга бағишланган Бутунжаҳон болалар кунида глобал ташаббусни қўллаб-қувватлаш учун ЮНИСEФ бир нечта элчихоналар ва бошқа ташкилотлар билан ҳамкорликда Тошкентда «Ташаббус болалар қўлида» акциясини ўтказмоқда.
Бола ҳуқуқлари тўғрисидаги конвенция 1989 йил 20 ноябрь куни БМТ Бош Ассамблеяси томонидан қабул қилинган.
193 та мамлакат, шу жумладан, Ўзбекистон томонидан ратификация қилинган конвенцияда 18 ёшгача бўлган ҳар бир инсон жинси, келиб чиқиши, дини ва соғлиғидаги чекловларга қарамай алоҳида ғамхўрлик ва ҳимояга муҳтожлиги айтилган.
Изоҳ (0)