Тошкент шаҳридаги «Наврўз» ресторанида Президент соврини учун тадбиркорлар, фермерлар ва ҳунармандлар ўртасида ўтказилган «Ташаббус — 2018» республика кўрик-танлови ғолибларини аниқлаш ҳамда уларни тантанали тақдирлаш маросими бўлиб ўтди. Бу ҳақда «Халқ сўзи» хабар берди.
Дастлаб кўрик-танловнинг «Энг яхши тадбиркор аёл», «Йилнинг энг яхши инновацион лойиҳаси», «Ёшларга энг кўп иш жойи яратган тадбиркор», «Энг яхши оилавий бизнес соҳиби», «Йилнинг энг яхши маҳсулоти», «Энг яхши экспортчи», «Энг масъулиятли ижтимоий шерик», «Энг яхши кўргазма намойиши учун» сингари қўшимча номинациялари бўйича совриндорлар аниқланди. Уларга махсус диплом ва қимматбаҳо совғалар берилди.
Шундан сўнг навбат бешта асосий — «Саноат соҳасида йилнинг энг яхши тадбиркори», «Хизмат кўрсатиш соҳасида йилнинг энг яхши тадбиркори», «Йилнинг энг яхши ёш тадбиркори», «Йилнинг энг яхши фермери», «Йилнинг энг яхши ҳунарманди» йўналишлари бўйича ғолиблар номи эълон қилишга етиб келди. Ушбу йўналишларда учинчи ва иккинчи ўрин эгалари муносиб тақдирлач, олий ўрин соҳиблари саҳнага чорланди.
Шундай қилиб, «Наманган момиқ сочиқлари» масъулияти чекланган жамияти раҳбари Ғиёсиддин Бобохонов «Саноат соҳасида йилнинг энг яхши тадбиркори», «Фарғона тиббий диагностика» масъулияти чекланган жамияти раҳбари Абдумалик Эргашев «Хизмат кўрсатиш соҳасида йилнинг энг яхши тадбиркори», Тошкент шаҳридаги «Azr-Textile Group» масъулияти чекланган жамияти раҳбари Азизжон Зоиров «Йилнинг энг яхши ёш тадбиркори», Хоразм вилоятидаги «Йўлдош Мажид» фермер хўжалиги раҳбари Йўлдош Искандаров «Йилнинг энг яхши фермери», самарқандлик моҳир ёғоч ўймакори Мансур Асадов «Йилнинг энг яхши ҳунарманди» деб топилди.
Барча йўналиш биринчи ўрин соҳибларига «Ташаббус — 2018» статуэткаси, олтин медаль, махсус диплом ҳамда Президент совғаси — Spark автомобилининг калити топширилди.
Изоҳ (0)