Ўзбекистон Қуролли Кучлари академиясида Тошкент шаҳрида жойлашган 107-мактабнинг ўқувчилари учун «Армия ва ёшлар» шиори остида учрашув ва экскурсия уюштирилди. Бу ҳақда Мудофаа вазирлиги матубот хизмати хабар берди.
Ёшлар иттифоқининг Тошкент шаҳар кенгаши ва 107-сонли мактаб раҳбарияти бошчилигида ўқувчи-ёшлар академия фаолияти, машғулот хоналарида ташкил этилган замонавий педагогик таълим тизими, моделлаштириш ва симуляция, ахборот-коммуникация технологиялари, курсантларнинг яшаш шароитлари билан яқиндан танишди.
Шундан сўнг, меҳмонлар Қуролли Кучлар академияси тарихи музейига саёҳат қилди. Жорий йилда ўзининг 100 ёшини нишонлаган Тошкент олий умумқўшин қўмондонлик билим юрти (ҳозирда Қуролли Кучлар академияси) 1918 йил 12 июлда ташкил топган. 1941—1945 йилларда фашизмга қарши олиб борилган уруш даврида билим юртида 25 та битирув ўтказилиб, 8 мингдан ортиқ офицерлар тайёрланган.
Ушбу қўмондонлик билим юрти битирувчилари орасида 150 нафардан ортиғи генерал унвонига эришган. Ўзбекистон Президентининг 2017 йил 25 апрелдаги тегишли қарорига мувофиқ Тошкент олий умумқўшин қўмондонлик билим юрти негизида янги Қуролли Кучлар академияси ташкил этилди.
Таассуротларга бой ўтган экскурсия якунида ўқувчи-ёшлар академиянинг катта мажлислар залидаги «Миллий армия – барқарор тараққиёт кафолати» мавзусида ўтказилган давра суҳбати қатнашди. Академиянинг тарбиявий ва мафкуравий ишлар бўлими бошлиғининг ўринбосари подполковник Лочин Нарзиқулов ўқувчиларга миллий армиямизда олиб борилаётган ислоҳотлар, инновацион ёндашувлар хусусида сўзлаб ўтди.
Тадбир сўнгида Қуролли Кучлар академияси фаолияти акс эттирилган ҳужжатли фильм намойиш этилди.