Австралияликлар супермаркет аравачаси билан террорчини йиқитишга уринган бошпанасиз эркак учун 100 минг доллар пул йиғди (видео)

9 ноябрь куни Мельбурнда теракт юз берди: 30 ёшли Ҳасан Халиф Шир Али ичида газ баллонлари бўлган автомобилда савдо марказига бориб урилди. Шундан кейин жиноятчи машинадан пичоқ билан тушиб, ўткинчиларга ҳужум қилди, аммо уни полициячилар отиб ташлади. ИШИД ўз бўйнига олган ҳужум чоғида бир киши ҳалок бўлди, деб ёзади TJournal.

Кўп ўтмай, ижтимоий тармоқларда ҳужум акс этган видеолар тарқалди. Уларда икки полициячи Ҳасан Халифни зарарсизлантиришга уринаётганини кўриш мумкин. Уларга эса бир ўткинчи дўкон аравачаси билан ёрдам берган: у аравача ёрдамида жиноятчини йиқитишга уринган.

Ёрдамчи 46 ёшли бошпанасиз Майкл Рожерс бўлиб чиқди. Маҳаллий телеканалга маълум қилишича, унинг полицияга ёрдам бериш истаги ғайриихтиёрий бўлган, аравачани эса тасодифан топиб олган. Ўз хатти-ҳаракатини Рожерс «ҳаётидаги биринчи тўғри иш» деб атади.

Рожерс ижтимоий тармоқларда миллий қаҳрамонга айланиб кетди, фойдаланувчилар унга «аравали одам» (Trolley man) деб ном берди.

10 ноябрь куни Melbourne Homeless Collective Майкл Рожерсга маблағ йиғиш бўйича краудфандинг кампаниясини бошлади. Фойдаланувчилар 130 минг Австралия долларидан ортиқ пул (100 минг АҚШ доллари) тўплаб берди.

https://twitter.com/fayfayang/status/1060774230659223552