Қашқадарёда солиқдан қарздорлиги бўлган фуқароларнинг пластик карточкаси қарздорлик бартараф этилгунига қадар вақтинча қулфлаб қўйилмоқда. Бу ҳақда «Turon 24»га вилоят давлат солиқ бошқармасининг жамоатчилик билан алоқалар ва ҳуқуқий ахборот шўъбаси бошлиғи Фирдавсий Жабборов маълум қилди.
Жорий йилнинг 1 октябридан фуқаронинг солиқдан қарздорлигини ундириш учун солиқ тўловчи жисмоний шахснинг пластик карталарига хизмат кўрсатувчи банк ҳисоб варақларидан ойига энг кам ойлик иш ҳақининг икки баравари миқдоридан кўп бўлмаган миқдордаги маблағ огоҳлантиришсиз ечиб олинади. Бундай амалиёт Президентнинг «Давлат солиқ хизмати органлари фаолиятини тубдан такомиллаштириш чора-тадбирлари тўғрисида»ги қарорига мувофиқ жорий этилмоқда.
«Биз тўғридан-тўғри аҳолининг пластик карточларидан пулни ечиб олишдан олдин вақтинча блоклаб қўйиш чорасини қўлладик, — дейди Фирдавсий Жабборов. — Фуқаро бундан хабар топгач, солиқдан қарздорлиги сабаб пластик карточкаси қулфлаб қўйилганини билдирамиз, қарздорликни бартараф этиш бўйича огоҳлантирамиз».
Солиқ идоралари томонидан солиқдан қарздорлиги бўлган жисмоний шахсларнинг банк пластик карточкаларида операцияларни вақтинча тўхтатиб туриш учун тижорат банкларига маълумотлар тақдим этилди. Қарздорлик бартараф этилгач, банк пластик карточкалари яна очиб берилади.
Вилоятда 509 мингдан ортиқ солиқ тўловчи жисмоний шахс бор. Солиқдан қарздорлар сони 152 минг нафарни, қарздорлик суммаси эса 28 миллиард сўмни ташкил этади.
Изоҳ (0)