Ўзбекистондаги меҳмонхоналарда нонуштанинг миллий кўриниши жорий этилади

Ўзбекистондаги меҳмонхоналар, ҳостеллар ва меҳмон уйларида қисқа вақт ичида нонуштанинг миллий кўриниши пайдо бўлади. Ўзбекистон ошпазлар уюшмаси шундай ташаббус билан чиқди, дея хабар беради «Халқ сўзи».

Қаймоқ, оби нон, сомса, мавсумий мевалар ва сабзавотлар, чой, новвот, ёнғоқлар, қуруқ мевалар ва миллий ширинликлар — буларнинг барчасини «ўзбекона нонушта» стандартига киритиб, турклар, инглизлар ёки французлардаги каби ҳақиқий брендга айлантириш режалаштириляпти.

— Инглизлар ёки турклар каби ўз анъаналаримиз бор. Қадим-қадимдан тонгда ўзбек оиласи дастурхонидан қаймоқ ва оби нон хушбўй ширин чойи билан жой олган. Меҳмонхоналарда «ўзбекона нонушта» стандартини жорий этиш ғояси шундан пайдо бўлди. Ҳудудлардан келиб чиқиб мазкур андоза муайян вилоятда дастурхонга қўйиладиган нон, сомса ва бошқа таом турлари ҳисобига тўлдирилиши мумкин. Масалан, Фарғона водийсида нонуштага мастава беришади. Ушбу барча ўзига хосликларни инобатга оламиз ва «ўзбекона нонушта» стандартини шакллантирамиз, — деди Ўзбекистон ошпазлар уюшмаси раиси Акбар Умаров.

Ҳозирча бу муҳокамалар босқичида турибди. Маҳаллий йирик меҳмонхоналарда «ўзбекона нонушта» ягоналигича қолмайди. Яқин кунлар ичида нафақат инглизча ва французча, балки айтайлик, корейсча, испанча ёки ҳиндча нонушталар ҳам пайдо бўлади. Маҳаллий ошпазлар эса бошқа мамлакатлардан келган ҳамкасбларига «ўзбекона нонушта» сирларини ўргатади.

Айни пайтда миллий стандартни юлдузлари сонидан қатъий назар меҳмонхоналар, хостеллар ва меҳмон уйларига татбиқ этиш мўлжалланяпти.